Almaty oblysynda qaraqshylyqpen aınalysqan top ustaldy
TALDYQORǴAN. QazAqparat - Almaty oblysynda jol boıynda qaraqshylyqpen aınalysqan qylmystyq top ustaldy. 3 adam júk kóliginiń júrgizýshisin qorqytyp, aqshasy, telefonyn jáne sómkesin tartyp alǵan, dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, 24 qazanda Kerbulaq aýdanynyń polıtsııa bólimine Volvo júk kóliginiń júrgizýshisi belgisiz bireýlerdiń ózin tonap ketkeni týraly shaǵymdanǵan.
Tekserý barysyndy júrgizýshini qaraqshylar Almaty-Óskemen tas jolynyń 126 shaqyrymynda tonaǵan. Úsh azamat kastetpen qorqytý arqyly jábirlenýshiniń 105 myń teńge aqshasyn, uıaly telefony men jeke sómkesin ıemdengen.
Polıtsııa qyzmetkerleri qylmystyq is qozǵap kúdiktilerdi jyldam anyqtady. Anyqtap qana qoımaı az ýaqyt ishinde qolǵa túsirip, qamaýǵa aldy. 32 jastaǵy bir kúdikti Qarasaı aýdanynyń turǵyny bolsa, qalǵan 2 azamat Almaty qalasynyń turǵyndary. Úsh azamattyń biri jábirlenýshiniń tanysy bolyp shyqty. Ol júrgizýshiniń baǵytyn bilip, eki kúdiktini qylmys ornyna óz kóligimen jetkizgen. Almaty oblystyq polıtsııa departamentiniń málimetinshe qaraqshylyq deregi boıynsha QR QK 191-babyna sáıkes tergeý amaldary jalǵasyp jatyr.
Kúdiktiler qamaýǵa alynyp, olardyń basqa da uqsas qylmystarǵa qatysynyń bar-joǵy anyqtalýda.
