Almaty oblysynda qaraqshylyq shabýyl jasalyp, polıtsııa arnaıy operatsııa uıymdastyrdy
TALDYQORǴAN.QazAqparat – Almaty oblysyndaǵy avtojolda qaraqshylyq shabýyl jasaldy, polıtseıler arnaıy operatsııa ótkizdi, -dep habarlaıdy QazAqparat tilshisi.
8 jeltoqsan kúni túnde Jambyl aýdany polıtsııasynyń kezekshi bólimine Jambyl oblysynyń 47 jastaǵy turǵyny habarlasyp, oǵan qaraqshylyq shabýyl jasalǵanyn aıtqan. Jábirlenýshiniń aqparaty boıynsha, ol dosymen birge Almaty – Bishkek avtojolynda kele jatqan jáne kóliginde iri somada qarajat bolǵan.
«Samsy aýylynyń shetinde jábirlenýshiniń kóligine «Nıssan Tsefıro» avtokóligi soqtyǵysqan. Osydan keıin medıtsınalyq betperde kıgen úsh adam jábirlenýshige shabýyl jasap, pyshaqpen qorqytyp, onyń kóligi men qarjysyn alyp ketken. Qaraqshylyq shabýyl deregi boıynsha QR Qylmystyq Kodeksiniń 192-babynyń 4-bóligi boıynsha sotqa deıingi tergeý amaldary bastaldy. Kúdiktiler eki kólikti de jaqyn mańdaǵy Samsy aýylyna tastap ketken», - dedi Almaty oblysy PD Krımınaldyq polıtsııa basqarmasynyń bastyǵy Ashat Danııar.
Polıtseıler ártúrli nusqalar men kúdikke ilingen toptardy pysyqtaı otyryp, qylmystyq toptyń izine tústi. Top quramynda Almaty qalasynyń 27, 31 jáne 37 jastaǵy turǵyndary bar ekeni anyqtaldy.
17 jeltoqsanda Almaty oblysynyń Krımınaldyq polıtsııa qyzmetkerleri arnaıy bólimshe jaýyngerleriniń qatysýymen kúdiktilerdi ustaý boıynsha arnaıy operatsııa júrgizdi.
«Sotqa deıingi tergeý barysynda jınaqtalǵan bultartpas aıǵaqtardan keıin kúdiktilerdiń barlyǵy asa aýyr qylmys jasaǵandaryn moıyndady.
«Tergeý barysynda ustalǵandardyń elıtalyq dúkenderden qymbat kıim men aıaq kıim satyp alý úshin 200 myń AQSh dollaryn jumsaǵany anyqtaldy. Budan basqa, urlanǵan aqshaǵa olar «Lada Prıora» jáne «Lend krýzer 200» markaly eki kólik satyp alǵany belgili boldy. Kólikter tárkilenip, sot sheshimine deıin arnaıy turaqqa toǵytyldy. Barlyq kúdiktilerge kúzetpen ustaý túrindegi bultartpaý sharasy tańdaldy. Sonymen qatar, ustalǵandardyń birin urlyq jasaǵany úshin ShQO polıtseıleri 2016 jyldyń shilde aıynan bastap izdestirip jatqanyn atap ótý qajet», - dep qorytyndylady Ashat Danııar.
