Almaty oblysynda qar qursaýynda qalǵan 11 adam qutqaryldy
TALDYQORǴAN. QazAqparat - Búgin «Taldyqorǵan – Qapal» avtojolynyń 59-shaqyrymynda Kóshkental aýylynyń mańynda qar qursaýynda qalǵan 4 jeńil avtokólikke kómek kórsetilip, jolaýshylar qutqaryldy, dep habarlaıdy QazAqparat tilshisi.
«Aýa raıynyń nasharlap, burqasyn daýyl soqqanyna baılanysty tótenshe jaǵdaı qyzmetimen birlesip, qaýipti jol ýchaskelerinde aldyn alý sharalaryn uıymdastyrdyq. Boranda qalý jaǵdaılaryn tekserý barysynda jolda qalǵan 4 kólik anyqtaldy. Kóliktegi 11 adamǵa, onyń ishinde 4 balaǵa kómek kórsetildi. Olardy jylytyp, kólikterin qaýipsiz aýmaqqa shyǵarýǵa qol ushyn berdik. Jolaýshylar jaqyn mańdaǵy Aqyn Sara aýylyna jetkizildi»,- dedi oblystyq PD Ákimshilik polıtsııa basqarmasynyń bastyǵy, polıtsııa polkovnıgi Dáýlet Moldahanov.
Almaty oblysynyń aýmaǵynda aýa temperatýrasy kúrt tómendep, boran soǵýyna baılanysty jol júrý múmkin bolmaǵandyqtan, respýblıkalyq jáne oblystyq mańyzy bar keıbir joldar jabyldy. Polıtseıler júrgizýshilerdiń jolǵa shyqpaýyn eskertip, dabyl qaǵýda. Oblystaǵy barlyq joldardaǵy qaýipti aýmaqtarda jol saqshylary táýlik boıy kezekshilik uıymdastyrýda.
