Almaty oblysynda qar qursaýynan 15 adam qutqaryldy
TALDYQORǴAN. QazAqparat – Almaty oblysynda qutqarýshylar qar qursaýynda qalyp qoıǵan 5 kóliktiń jolaýshylaryn qutqardy, dep habarlaıdy QazAqparat Tótenshe jaǵdaılar departamentiniń baspasóz qyzmetine silteme jasap.
«Almaty oblystyq Tótenshe jaǵdaılar departamentine Eńbekshiqazaq aýdanyndaǵy «Qyrbaltabaı-Aqjal» baǵytyndaǵy avtojol boıynda 15 jolaýshysy bar 5 kólik turyp qalǵandyǵy jóninde habar túsken. Eńbekshiqazaq aýdany tótenshe jaǵdaılar bóliminiń basshysy men Qyrbaltabaı aýylynyń ákimi uıymdastyrǵan apattan qutqarý jumystaryna jol jóndeýshiler men olardyń arnaıy tehnıkasy jumyldyryldy. Nátıjesinde jol tazartylyp, kólikter qardan shyǵarylyp, olar saparlaryn jalǵastyrdy»,-delingen habarlamada.
Aýa raıy durystalǵansha, joldaǵy qozǵalysty shekteý úshin polıtsııa qyzmetkerlerinen ýaqytsha kezekshilik uıymdastyryldy.
«El turǵyndaryna atalǵan jol bóligine shyqpaı tura turýǵa keńes beremiz»,-delingen qutqarýshylar taratqan habarda.
