Almaty oblysynda qańyrap turǵan taǵy eki qant zaýyty iske qosylady
TALDYQORǴAN.QazAqparat - Almaty oblysynda qańyrap turǵan eki qant zaýyty qaıta iske qosylady dep josparlanýda. Biri Eskeldi aýdanyndaǵy mekeme bolsa, ekinshisi Alakól aýdanyndaǵy kásiporyn, dep habarlaıdy QazAqparat tilshisi.
Máselen, Qarabulaq aýylyndaǵy qant zaýyty sońǵy ónimin 2013 jyly óndirgen. Sodan beri kásiporynnyń jumysy toqtap tur. Qazir Kóksý qant zaýytynyń basshylyǵy kásiporyndy qaıta jandandyrýǵa ınvestor retinde qyzyǵýshylyqtaryn tanytýda. Zaýyt basshylary kásiporyn 2020 jyly tolyq iske qosylady dep josparlap otyr. Eger barlyǵy sátimen júzege assa, 500-den astam adam jumysqa alynady.
«Bıyl osy zaýyttyń qasyna burynǵy qant qyzylshasyn jınaǵan jerge qant qyzylshasyn qabyldaımyz. Jańǵyrtyp, qaıtadan joba jasap, jańadan qural-jabdyqtarmen qamtamasyz etýimiz qajet bolady», - dedi Kóksý qant zaýytynyń dırektory Altynbek Abatov.
Qarabulaq zaýytynan bólek Alakól aýdanyndaǵy qant zaýytynyń da jumysyn jandandyrý máselesi qarastyrylýda. Al Almaty óńirinen shıkizat tasymaý úshin Qapshaǵaıda taǵy bir kásiporyn salynady.
«Investorlardyń ózderi bizge kelip, sol zaýyttardy qalaı alsaq dep surap, bizge usynys jasap jatyr. Biraq olardyń ıeleri bar. Olar qarjysyn bólip, salmasa onda biz olarmen osy zaýyt jóninde sóılesip, máseleni sheshý joldaryn qarastyramyz», - dedi Almaty oblysynyń ákimi Amandyq Batalov.
Aıta keteıik, Prezıdenttiń tikeleı tapsyrmasyna oraı Almaty oblysynda qant qyzylshasyn ósirý qaıta jandanyp, toqtap turǵan qant zaýyttary iske qosylýda. Jalpy óńirde 5 qant zaýyty bolǵan bolsa, qazir onyń ekeýi ıaǵnı, Kóksý men Aqsý zaýytttary qaıta iske qosyldy. Al bıyl Jetisý jeri 14 myń gektarǵa tátti túbirdi egýdi josparlap otyr.
