Almaty oblysynda qant qyzylshasyn ósirgen sharýalar aqshalaryn ala almaı júr
TALDYQORǴAN. QazAqparat - Almaty oblysynda qant qyzylshasyn ósirgen sharýalar aqshalaryn ala almaı júr. Aıtýlarynsha, kelisimshart boıynsha 90 kúnniń ishinde tólenýi tıis qarajattaryn Kóksý qant zaýytynyń basshylyǵy sozbaqqa salyp, bermeı jatyr. Al zaýyttyń basshysy 80 sharýashylyqtyń aldyndaǵy qaryz 600 mıllıon teńgeden asady dep otyr, dep habarlaıdy QazAqparat tilshisi.
«90 kúnniń ishinde ótep beremiz degen aqshamyzdy áli bermeı jatyr. 90 kúnnen asyp ketti. Keıbireýleriniki 100 kúnnen asyp ketti. Aqshamyzdy surap kelip otyrmyz. Poshtaǵa aqshamyz tústi me dep kúnde qaraımyz. Meniń «Ulan» sharýa qojalyǵyma «Kóksý qant» zaýyty 4,5 mln teńge qaryz. Lızıngke alǵan tehnıkamyz bar. Olar da aqshasyn tóle dep jatyr. Endi eki ortada qaǵaz tasýmen júrmiz. Olarǵa «Kóksý qant» zaýyty aqshamyzdy bermegendikten nesıeni tóleı almaı jatyrmyz degen qujatymyzdy aparyp berdik», - deıdi Qaratal aýdanynyń turǵyny Aıymgúl Qoshqarbaeva.
Qazir «Kóksý qant» zaýytynyń aýlasynda birde-bir qant qyzylshasy qalmaǵan. Kásiporyn barlyq qabyldanǵan ónimdi óndirip tastaǵan. Al zaýyt basshysy osy qant qyzylshasyn ótkizgen sharýalardyń qaryzyn aıdyń sońyna deıin tolyq tóleıtinin aıtady.
«Qalǵan 80 qojalyqpen osy aqpan aıynyń sońyna deıin eseptesip tastaımyz. Olardyń aldyndaǵy jalpy qaryzymyz 600 mln teńgeden asady. Negizi biz buǵan deıin 400-ge jýyq sharýashylyqtyń aldyndaǵy qarajatymyzdy tolyq tóledik», - dedi «Kóksý qant» zaýytynyń dırektory Altynbek Abatov.
«Kóksý qant» zaýytyna qant qyzylshasyn ótkizip, aqshasyn 90 kún boıy kútý sharýalar úshin qıynnyń qıyny bolyp tur. Biraq qant zaýytynyń basshylyǵy qoıyp otyrǵan talapqa dıqandardyń kelispeske amaldary joq. Óıtkeni óńirde olardyń qant qyzylshasyn qabyldaı qoıatyn basqa zaýyt joq. Al qaıta iske qosylǵan Aqsý qant zaýyty sharýalar úshin tym alys.
Aıta ketý kerek, Kóksý qant zaýytyna qant qyzylshasyn ótkizetin sharýalar jylda túrli qıyndyqtarǵa tap bolady. Máselen, ala jazdaı ósirgen ónimderin kúzde zaýytqa ótkizý úshin saǵattap, táýliktep kezekte turýǵa májbúr. Al ónimderin áýpirimdep ótkizgennen keıin aqshalaryn alý úshin taǵy da birneshe aılap kútedi.
