Almaty oblysynda qant qyzylshasy alqabynyń kólemi ósedi
«Aýyl turǵyndarynyń tabysyn arttyrý jáne azyq-túlik qaýipsizdigin qamtamasyz etý maqsatynda agroónerkásiptik keshendi damytý boıynsha sharalar qabyldanýda. Bıyl memlekettik qoldaýǵa 50 mlrd teńgeden astam qarajat bólindi, onyń ishinde 43 mlrd teńge – sýbsıdııalar. 15 myń sharýashylyq qamtyldy. Oblysta aýyl sharýashylyǵy daqyldary alqaby 972 myń gektarǵa jetkizildi, onyń ishinde qant qyzylshasy – 16 myń, júgeri – 95 myń, kartop 40 myń gektardan asty. Biz 2025 jylǵa deıin qant qyzylshasy alqabyn 53 myń gektarǵa deıin ulǵaıtý esebinen óndiris kólemin eki mıllıon tonnaǵa deıin jetkizý jóninde aýqymdy mindet qoıyp otyrmyz», - dedi A. Batalov Ortalyq kommýnıkatsııalar qyzmetinde.
Onyń aıtýynsha, ol úshin jalpy óńdeý qýaty jylyna 1 mln 100 myń tonna Kóksý jáne Aqsý qant zaýyttaryn jańǵyrtý josparlanýda.
Budan bólek, 2030 jylǵa qaraı sýarmaly jer kólemin 3 mıllıon gektarǵa deıin ulǵaıtý týraly Elbasynyń jáne Prezıdenttiń 2019 jylǵy Joldaýyndaǵy tapsyrmalary aıasynda oblys boıynsha 138 myń gektardy qalpyna keltirý josparlanýda.
Sońǵy úsh jylda aınalymǵa 39 myń gektar buryn shyǵyp qalǵan sýarmaly jer tartyldy. Osy jyly 14 myń gektardy qalpyna keltirý úshin 6,3 mlrd teńgege ırrıgatsııalyq qurylystarǵa kúrdeli jóndeý júrgizilýde.
«Ótken jylmen salystyrǵanda mal men qus sany orta eseppen 2 protsentke ósti. Mal qystaýy úshin oblys jem-shóppen tolyq qamtamasyz etilip, 5,3 mln tonna azyq daıyndaldy. Mańǵystaý oblysynyń zardap shekken fermerlerine gýmanıtarlyq kómek retinde 54 vagon shóp jiberildi. Barlyǵy 117 mal bordaqylaý alańy jáne 84 sút-taýar fermasy jumys isteıdi, sonyń esebinen et óńdeý kásiporyndarynyń júktemesi 72%-ǵa, sút zaýyttary 85%-ke jetti. Agroónerkásip kesheniniń qaıta óńdelgen ónimderiniń eksporty 25% ósip, 97 mln AQSh dollaryn nemese jalpy agroónerkásip kesheni eksportynyń 73 paıyzyn qurady. Jyl sońyna qaraı aýyl sharýashylyǵynyń jalpy ónim kólemi alǵash ret bir trıllıon teńgeden asady», - dedi ákim.