Almaty oblysynda qaqpanmen qaraquıryq aýlaǵan brakoner ustaldy

ASTANA. QazAqparat - Almaty oblysynyń Balqash aýdanynyń aýmaǵynda qaraquıryq aýlaǵan brakoner ustaldy. Bul týraly QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet Feısbýktegi paraqshasynda jazdy, dep habarlaıdy QazAqparat tilshisi.

«31 tamyzda saǵat 21:00-der shamasynda «Ohotzooprom» ÓB» RMQK ınspektorlary Almaty oblysy Balqash aýdanynyń aýmaǵyndaǵy Bereke aýyldyq okrýgynyń mańynda atpen ketip bara jatqan K.B. (1945 j.t.) azamatty ustady. Onyń qanjyǵasynan qaraquıryqtyń jarty eti alyndy», - delingen habarlamada.

Aýyl turǵynynyń aıtýynsha, ol ańdy qaqpan men tuzaq qurý arqyly ustaǵan.

Atalǵan fakty boıynsha Balqash aýdandyq ІІB-de QR QK-niń 339-babyna sáıkes qylmystyq is qozǵaldy.