Almaty oblysynda ıtti kóligine baılap, súıregen júrgizýshi ustaldy
TALDYQORǴAN. QazAqparat – Almaty oblysynda ıtti júk kóliginiń artyna baılap, súıretken júrgizýshi ustaldy, dep habarlaıdy QazAqparat tilshisi.
Qazir 37 jastaǵy turǵynnyń ústinen 316-baby («Janýarlarǵa qatygezdik jasaý») boıynsha qylmystyq óndiris qozǵaldy.
Oqıǵa búgin Qulja tas jolynyń boıynda boldy. Arqanmen baılanǵan ıtti júk kóligi súırep bara jatqan vıdeo áleýmettik jelide tarady.
Ustalǵan azamattyń aıtýynsha, ol qoqys tasýmen aınalysady. Ittiń óleksesin kórgen soń kólik júrgizýshi ony adamdar joq jerge aparyp tastaǵysy kelgen.
Almaty oblystyq Polıtsııa departamenti baspasóz qyzmetiniń málimetinshe, ustalǵan azamat Eńbekshiqazaq aýdanynyń turǵyny.
Aıta keteıik, Qazaqstanda janýarlardy qorǵaýǵa jáne olarǵa qatygezdik kórsetkenderge jaýapkeshilikti kúsheıtýge baǵyttalǵan zań jobasy ázirlendi. Qazir qujat qoǵam talqylaýyna usynylǵan.
«Qazirgi ýaqytta barlyq janýarlarǵa, onyń ishinde, úı, jabaıy jáne aýyl sharýashylyǵy janýarlaryna jaýapkershilikpen qaraý týraly birde-bir zań joq. Janýarlarǵa qatygezdik kórsetken adamdar týraly habarlamalar áleýmettik jelilerde jıi kezdesip jatyr.
Alaıda, búginde Qazaqstandaǵy janýarlarǵa qatygezdik kórsetkeni úshin taǵaıyndalatyn jaza tym jeńil. Sondyqtan, Memleket basshysy Qasym-Jomart Kemelulynyń tapsyrmasy boıynsha, birinshi kezekte, janýarlardy haıýanattar baǵynda ustaýǵa qoıylatyn talaptardy qatańdatýdy alǵa qoıyp otyrmyz», - degen bolatyn Ekologııa, geologııa jáne tabıǵı resýrstar mınıstri Maǵzum Myrzaǵalıev.
