Almaty oblysynda Italııamen birlesken 5 kásiporyn ashylady
TALDYQORǴAN. QazAqparat - Almaty oblysyna jumys saparymen kelgen ıtalııalyq «Areas More» kompanııasynyń prezıdenti Sılvııa Pessını jergilikti kásipkerlermen kezdesti. Júzdesý barysynda Italııa bıznesiniń óńirden bes kásiporyn ashatyny belgili boldy, dep habarlaıdy QazAqparat.
Almaty oblysyna jumys sapary barysynda Pessını hanym Jetisý óńirindegi aýyl sharýashylyǵy salasyna erekshe qyzyǵýshylyq tanytty. Onyń aıtýynsha, bul sala sheteldik ınvestorlar úshin ınvestıtsııalyq jaǵynan tartymdy, asa perspektıvaly bıznes túri bolyp sanalady. Italııa bıznesmeni osy baǵyttaǵy áńgimeni oblystyq Kásipkerler palatasynda Іsker áıelder keńesiniń jetekshisi Rımma Salyqovamen kezdeskende de talqylady.
«Aımaqta kásipkerlik sýbektileriniń 40%-nan astamyn áıelder qaýymy basqarady. Áıel-kásipkerler qyzmet kórsetýden bastap ónerkásip salasyna deıin eńbek etip keledi. Sondyqtan, meniń oıymsha, óńirlik bıznes úshin Italııadaǵy kásipkerliktiń damý tájirıbesi qyzyqty bolmaq. Aldaǵy ýaqytta birlesken jobalardy iske asyrýǵa daıynbyz», - dedi Rımma Salyqova kezdesý barysynda.
Al jergilikti kásipkerlermen áńgimesinde Sılvııa Pessını ıtalııalyq kásipkerlerdiń shıkizatty qaıta óńdeıtin birlesken jańa kásiporyndar qurýǵa yntaly ekenin jetkizdi. Onyń aıtýynsha, ondaı kásiporyndar sý jańa tehnologııalarmen jabdyqtalyp, sapaly qazaqstandyq shıkizatpen qamtamasyz etilip otyrady. Osylaısha, 2018 jyldyń sońyna deıin óńirde bes kásiporyn ashylatyny josparlanǵan.
«Almaty oblysynda júzege asyrylatyn jobalar tańdaldy. Biz jańa baǵyttaǵy kásiporyndar ashyp, olardyń damýyna kóńil bóletin bolamyz. Italııalyq bankter men qorlar bul jobalardy qarjylandyrýǵa daıyn. Soıa, alma jáne basqa da aýyl sharýashylyǵy ónimderin qaıta óńdeý, sonymen birge agrotehnıkany shyǵarýǵa qyzyǵýshylyq joǵary», - dedi Sılvııa Pessını.
Jumys sapary aıasynda ol óńirdiń birqatar fermerlik sharýashylyqtarynda boldy.
Aıta keteıik, «Areas More» kompanııasy agroónerkásiptik keshende tabysty eńbek etip jatqan iri kásiporyn. Búgingi tańda kásiporyn 50 kompanııamen seriktes jáne álem boıynsha 100-den astam kompanııamen áriptes atanǵan.
