Almaty oblysynda ıt talaǵan 7 jasar bala aýrýhanada kóz jumdy
TALDYQORǴAN. QazAqparat - Taldyqorǵan qalasyna qarasty Merekelik saıajaıynda 7 jastaǵy balany ıt talap, ol aýrýhanada kóz jumdy, dep habarlaıdy QazAqparat tilshisi.
Oqıǵany Almaty oblysy Densaýlyq saqtaý basqarmasynyń baspasóz qyzmeti rastady.
«Taldyqorǵandaǵy oblystyq balalar aýrýhanasyna naýqas 6 qarasha kúni keshki saǵat besterde tústen. 2011 jyl týǵan bala óte aýyr jaǵdaıda aýrýhanaǵa jetkizildi. Ol 7 qarasha kúni saǵat 13:35-te qaıtys boldy. Ony ıt qapqan. Balanyń bas terisi, beti, moıyny, sol jaq ıyǵy, sol jaq aıaǵy qatty jaraqattalǵan. Bala aýyr travmatıkalyq shok alǵan», - dedi oblystyq densaýlyq saqtaý basqarmasynyń baspasóz hatshysy Láılim Áýbákirova.
Al oblystyq polıtsııa departamentiniń baspasóz qyzmeti de atalǵan faktini rastap, osy fakti boıynsha sot-aldy tergeý bastalǵanyn jetkizdi.
«Balanyń ólimine baılanysty sot aldy tergeý QR QK-niń 104-baby boıynsha júrgizilip jatyr. Ittiń ıesi anyqtaldy. Ol arnaıy qolhatpen jiberildi. Tergeý oblystyq polıtsııa departamentiniń qatań baqylaýynda», - dedi atalǵan vedomstvanyń ókili Kóbeıhan Nurahmetov.
