Almaty oblysynda ishimdik úshin qarııanyń úıin tonaǵandar ustaldy
TALDYQORǴAN. QazAqparat - Almaty oblysynyń Eskeldi aýdanynda 93 jastaǵy erli-zaıypty qarııalardyń úıin tonaǵan kúdiktiler ustalyp, qamaýǵa alyndy, dep habarlaıdy QazAqparat tilshisi.
Aldyn-ala tekserý barysynda anyqtalǵandaı, kúdiktiler ishimdikke sylqııa toıyp alyp, alkogoldik mas kúıde otyrysty jalǵastyrý maqsatynda aqsha izdegen. Ózara aqyldasý kezinde qarsylyq kórsetýge shamalary kelmeıtin aýdan ortalyǵynyń egde jastaǵy qarııalaryn tonaý týraly sheshimge kelgen. Ol úıden aqsha tabylmaǵannan keıin, ústel ústindegi noýtbýkty alyp ketken. Degenmen, ony satyp úlgermegen.
«Polıtsııaǵa kómek surap habarlasqan qońyraý boıynsha 93 jastaǵy erli-zaıypty qarııalardyń úıine qara tústi betperde kıgen belgisiz eki adam kelip, tapa-tal túste kúsh kórsetip, aqsha talap etip, úıdegi noýtbýkty alyp ketken. Bul qylmysty ashýǵa baǵyttalǵan jedel-izdestirý sharalary barysynda aýdan ortalyǵynyń esh jerinde qyzmet jasamaıtyn 34 jáne 35 jastaǵy eki azamaty ustaldy. Tekserý barysynda qoldy bolǵan noýtbýk pen qara tústi betperdeler, qolǵaptar kúdikti turatyn úıdiń shatyrynan tabyldy. Olar is materıaldaryna aıǵaqzat retinde tirkeldi»,- dep málimdedi Almaty oblysy polıtsııa departamentiniń baspasóz qyzmeti.
Qazirgi ýaqytta qos kúdiktige qatysty QR Qylmystyq kodeksiniń 191-baby 2-tarmaǵy boıynsha sotqa deıingi tergeý jumystary júrip jatyr. 34 jáne 35 jastaǵy azamattar aýdandyq ýaqytsha ustaý ızolıatoryna qamaýǵa alyndy.
