Almaty oblysynda ishimdik tutyný kórsetkishi 73% tómendegen
TALDYQORǴAN. QazAqparat - Almaty oblysynda ishimdik ishý nemese qoǵamdyq oryndarda masań kúıde bolý kórsetkishi 73% tómendegen, dep habarlaıdy QazAqparat tilshisi.
Almaty oblysynyń tártip saqshylary taratqan aqparatqa sáıkes, 2020 jyldyń tórt aıynyń qorytyndysy boıynsha qoǵamdyq orynda ishimdik ishýdiń nemese masań kúıde kelýdiń 900-den astam deregi tirkelgen. Byltyrǵy jyldyń osy kezeńimen salystyrǵanda bul kórsetkish 73 paıyzǵa tómendegen.
«Bıyl oblys aýmaǵynda qoǵamdyq oryndarda masań kúıde júrý deregi boıynsha ákimshilik hattamalar toltyrylyp, 926 tulǵa jaýapqa tartyldy. Tártip saqshylarynyń aldyn alý boıynsha júrgizgen jumystarynyń arqasynda bul kórsetkish ótken jylmen salystyrǵanda áldeqaıda tómendedi. Quqyq buzýshylyqqa jol bergen azamattarǵa bes aılyq eseptik kórsetkish mólsherinde aıyppul salyndy», - dep málimedi oblystyq PD baspasóz qyzmetinen.
Sonymen qatar, qoǵamdyq oryndarda temeki buıymdaryn tutyný derekteri de byltyrǵy jylǵy kórsetkishpen salystarǵanda eki ese azaıǵan.
«Jol saqshylary joldyń qaýipsizdigin qamtamasyz etý barysynda jyl basynan beri 109 júrgizýshiniń masań kúıde kólik basqarǵanyn anyqtady. Atalǵan derekter boıynsha tıisti hattamalar toltyrylyp, sottyń sheshimi boıynsha júrgizýshiler kólik basqarý quqyǵynan aıyryldy. Bul kórsetkish byltyrǵy jylmen salystyrǵanda 36 paıyzǵa tómen»,- dep tolyqtyrdy atalǵan vedomstvonyń ókilderi.
Óz kezeginde, oblystyq polıtseıler qoǵamdyq oryndarda jáne kólik basqarǵanda ishimdik ishýdiń óte qaıǵyly jaǵdaılarǵa ákeletinin eskertedi.
