Almaty oblysynda iri kólemde gashısh pen marıhýana tárkilendi

TALDYQORǴAN. QazAqparat - Arnaıy is-shara barysynda Almaty oblysynyń polıtseıleri esirtkiniń zańsyz aınalymynan iri kólemde gashısh pen marıhýanany tárkiledi. Esirtki saýdasynyń oshaǵy Qarasaı aýdanynda bolǵan, dep habarlaıdy QazAqparat tilshisi.

Oblystyq PD Esirtki bıznesine qarsy is-qımyl basqarmasy UQK oblystyq departamentiniń ókilderimen birlesken arnaıy is-shara ótkizip, esirtki zattaryn saýdalady degen kúdikpen 41 jastaǵy azamatty qolǵa túsirdi.

«Kúdikti Іrgeli aýylynda ustaldy. Ustalǵan kezde kúdiktiden 9 kılogramm marıhýana tárkilendi, sonymen qatar onyń turǵylyqty mekenjaıyna sanktsııalanǵan tekserý júrgizý kezinde 7,5 kılogramnan astam gashısh tabyldy. Qazirgi ýaqytta asa iri kólemde esirtki zattaryn saqtaý jáne olardy satý deregi boıynsha QR Qylmystyq kodeksiniń 297-babyna sáıkes sotqa deıingi tergeý amaldary júrgizilip jatyr»,- dep málimdedi Almaty oblysy PD baspasóz qyzmetinen.

Polıtseıler taratqan aqparatqa sáıkes, kúdikti Qarasaı aýdany polıtsııasynyń ýaqytsha ustaý oqshaýlaǵyshyna qamaqqa alyndy. Qylmystyq isti tergeý isi Polıtsııa departamenti Tergeý basqaramasynyń óndirisinde.