Almaty oblysynda iri et óńdeý kesheni salynady

TALDYQORǴAN. QazAqparat - Búgin oblys ákimdiginde óńir basshysy Amandyq Batalov pen «BaumanGmbh&COKG» kompanııasynyń bas aktsıoneri Raıner Baýman bastaǵan kompanııa ókilderi qosymsha azyqtandyrý, mal soıý, tereńnen óńdeý, usaq mal etinen polýfabrıkattar men daıyn ónim shyǵarýmen aınalysatyn iri et óńdeý kesheniniń qurylysy ınvestıtsııalyq jobasyn júzege asyrý týraly máselelerdi talqylady, dep habarlaıdy QazAqparat oblys ákiminiń baspasóz qyzmetine silteme jasap.

Kezdesý barysynda óńir basshysy Amandyq Batalov usaq mal etin óńdeý salasyn damytýda bul jobanyń mańyzy zor ekenin atap ótti.

«Elimizde 20 mln basqa jýyq qoı bar, biraq qoı etin óńdeıtin birde de bir kásiporyn joq. Sondyqtan bul et óńdeý kesheni qurylysynyń tolyqqandy júzege asýy biz úshin asa mańyzdy. Biz óz tarapymyzdan sizderdiń kompanııanyń tıimdi jumys isteýine qajetti barlyq jaǵdaılardy jasaımyz. Barlyq ınjenerlik júıeler - elektr, jylý, gaz, káriz júıeleri tartylatyn bolady, sonymen qatar jobany júzege asyrýdaǵy jumys barysynda týyndaǵan máselelerdi sheshýge de qoldaý kórsetiledi», - dedi A. Batalov.

Sonymen qatar oblys ákimi nemis kompanııasynyń jobalaýǵa qashan kirisetinin, jobanyń jergilikti klımatqa, geografııalyq erekshelikterine qashan beıimdele bastaıtynyn, qurylystyń birinshi kezegi qashan aıaqtalyp, qoldanysqa beriletinin bilýdiń mańyzdy ekenin de tilge tıek etti. Bul oraıda kompanııa ókilderine barlyq týyndaǵan máselelerge qatysty óziniń orynbasary Serikjan Beskempirovke, «Jetisý» ÁKK» UQ» AQ men «Almaty oblysyn damytý jónindegi «Alataý» AQ basshylyqtaryna habarlasyp, birlesip jumys isteýge shaqyrdy.

«Ortaq jumystyń arqasynda jobany sátti júzege asyratynymyzǵa senimdimin. Sapaly ónim shyǵaryp, turaqty jumys oryndary ashylǵanda onyń nátıjesin kóretin bolamyz», - dedi A. Batalov.

Kezdesý qorytyndysynda oblys ákiminiń orynbasary Serikjan Beskempirov  pen «BaumanGmbh&COKG» kompanııasynyń bas aktsıoneri Raıner Baýman ekijaqty yntymaqtastyqty odan ári damytý týraly memorandýmǵa qol qoıdy.
 

Jalpy, «BaumanGmbh&COKG» kompanııasy 1930 jyly qurylǵan, qoı etin óńdeıtin Eýropadaǵy eń iri kompanııalardyń qatarynda. Qazirgi kezde qozy etin saýdalaýda Germanııadaǵy naryqtyń 25 %, Eýropada eleýli bóligin qamtamasyz etip otyr. Investıtsııalyq jobanyń jalpy quny 7,1 mlrd teńge. Birinshi kezeginiń qýaty jylyna 15 myń tonna bolsa, 2-shi kezegi - 30 myń tonna. Qurylatyn jumys oryndarynyń sany - 700-den astam. 1-shi kezeginiń júzege asyrylý merzimi 2017-2018 j.j. Kásiporyn ónimderi ishki naryqqa da jáne eksportqa da shyǵarylatyn bolady.