Almaty oblysynda golland tehnologııasymen jylyjaılar qurastyrylýda
ASTANA. QazAqparat - Qazaqstandyq fermerler golland tehnologııasymen jylyjaı qurastyratyn zaýyt saldy. Atalǵan kásiporynnyń jumysy jaıynda onyń dırektory Baýyrjan Baımuhanbetov «Jylyjaılar. Kókónis sharýashylyǵy. Almaty sýlandyrý jáne gúlder - 2018» kórmesi aıasynda aıtyp berdi, dep habarlaıdy QazAqparat.
Onyń atap ótýinshe, bul saladaǵy naryq jan-jaqty zerttelgen jáne úldir jylyjaıdyń kelmeske ketkendigine kóz jetkizilgen. Qazirgi ýaqytta fermerlerge tıimdiligi joǵary jylyjaılar qajet.
«Biz zaýyt salýǵa jáne tehnologııany gollandyq kompanııadan satyp alýǵa sheshim qabyldadyq. Zaýytty jalpy somasy 2 mlrd teńge bolatyn jeke ınvestıtsııa esebinen saldyq. Ótken jyly zaýyt iske qosyldy. Biz negizinen jyljaı qańqasyn ázirleımiz. Al qalǵan shyny, aýa temperatýrasyn retteýge arnalǵan apparattar men jaryqtandyrǵyshtardy Gollandııa, Italııa jáne Izraılden ákelemiz. Jylyjaı qańqasyn jergilikti alıýmınıı men metalldan jasaımyz. Jergilikti shıkizat pen jumys kúshiniń arqasynda jylyjaı qurylysy bizdiń fermerler úshin birshama arzanǵa túsip otyr. Fermerler jalpy aýmaǵy 3 gektardy quraıtyn qyzanaq pen qııar ósirýge arnalǵan shyny jylyjaıǵa tapsyrys berdi. Qańqasy daıyn, montajdaý jumystaryn júrgizip jatyrmyz. Kúzge qaraı jylyjaı qurylysy tolyq aıaqtalady», - dedi Baýyrjan Baımuhanbetov.
Onyń aıtýynsha, kásipkerlerde bir jyl boıy jergilikti ónimniń joǵary ónimdiligine kepildik beriledi. Sonymen qatar mamandardyń keńesi de uıymdastyrylady.
«Búkil álemde gollandııa tehnologııasynyń bul salada ilgeri ekendigin biledi. Úldir arqyly ónim alyp otyrǵan bizdiń fermerlerge qaraǵan olar úsh ese kóp ónim jınaıdy. Soǵan sáıkes ónimniń ózindik quny da arzanǵa túsedi. Árıne, shyny jylyjaı qymbatqa túsedi. Biraq, paıdalaný barysynda ol tıimdi bolady. Úldirdi 2-3 jylda aýystyryp turý qajet. Al shyny 30 jylǵa deıin qyzmet etedi», - dedi ol.
