Almaty oblysynda ǵasyr jasaǵan keıýana referendýmǵa qatysty

TALDYQORǴAN. QazAqparat – Almaty oblysynda alǵashqylardyń biri bolyp Jarkent qalasynyń turǵyny, 100 jastaǵy Zeınelhan Ospanova referendým ýchaskesine kelip, óz daýysyn berdi, dep habarlaıdy QazAqparat tilshisi.

«Urpaqtarym aman bolsyn! Artymyzdaǵy jastar jasasyn! Qazaqstanymyzdyń jaqsy bir azamattary bolyp óssin! Qazaǵymyzdyń sany kóbeıe bersin! Jarkentimiz kórkeıe tússin!» - dep keıýana batasyn da berdi.

12 qursaq kótergen altyn alqa ıegeri sanaly ǵumyryndaǵy barlyq saıası naýqandarǵa belsendi qatysyp keledi. Ásirese, sońǵy 30 jyldaǵy ár saılaý men referendým esinde qalǵanyn aıtady.

«Ǵasyr jasaǵan áje árkez jastarǵa úlgi bolyp, memlekettiń irgesin nyǵaıtý baǵytyndaǵy ózgeristerge qatysýǵa tyrysady», - deıdi referendým ýchaskesiniń músheleri.

Dástúr boıynsha alǵashqy daýys bergen adamǵa estelik syılyq tabystaldy. Jalpy, búgin Almaty oblysy boıynsha 1053 ýchaske óz esigin aıqara ashty. Óńirde daýys berý quqyǵyna ıe elektorat sany 1 mln 200 myńnan asady.

Aıta ketsek, ortalyq referendým komıssııasynyń hatshysy Muhtar Erman málim etkendeı, daýys berý 9 964 ýchaskede ótip jatyr.