Almaty oblysynda ejelgi túrki dáýirinde tasqa qashalǵan Umaı ananyń beınesi tabyldy
ALMATY. 30 qarasha. QazAqparat - Qazaqstanda Umaı ananyń tasqa qashalǵan altynshy beınesi tabyldy. Bul týraly búgin Almatyda «Tarıhı-mádenı mura jáne zamanaýı mádenıet» degen taqyrypta ótip jatqan halyqaralyq ǵylymı-tájirıbelik semınarda jarııalandy.
«Bir aı buryn bizdiń ınstıtýttyń ǵalymdary Almaty oblysy Jambyl aýdanynda tasqa qashalǵan músindi tapty. Ol sarapshylardyń paıymdaýynsha, Umaı anamyzdyń beınesi. Buǵan deıin Umaı anamyzdyń beınesi kóne túrkiler mekendegen jerlerde 5 ret tabylǵan eken. Bul altynshysy. Ol sensatsııalyq ǵylymı jańalyq deýge bolady», - deıdi Kóshpendiler mádenıeti murasy jáne Mádenıet saıasaty ınstıtýtynyń negizinde jańadan qurylǵan Qazaq ǵylymı-zertteý mádenıet ınstıtýtynyń dırektory, fılosofııa ǵylymdarynyń doktory Ǵazız Telebaev.
Bul jańalyqty ashqan Kóshpendiler mádenıeti ınstıtýtynyń jetekshi ǵylymı qyzmetkeri Alekseı Rogojınskıı bastaǵan arheologııalyq- etnografııalyq ǵylymı ekspedıtsııa. Alekseı Evgenevıchtiń aıtýynsha, ol ejelgi túrki kezeńinde ıaǵnı, eń keminde bizdiń dáýirimizge deıingi 7-8 ǵasyrlarda qashalǵan. Qoǵaly shatqalynan tabylǵan beınelengen sýretke qatysty ǵalymdar arasynda ártúrli pikirler bar. Túrkitanýshylar keıbiri bul Umaı ana dese, ekinshileri ejelgi Túrki jáne Qytaı jazbalarynda Umaı ananyń beınesine qatysty dál, naqty málimetterdiń joǵyn alǵa tartýda.
«Bul Qazaqstan aýmaǵyndaǵy Umaı ananyń tasqa qashalǵan alǵashqy beınesi emes. Buǵan deıin Ońtústik Qazaqstanda tabylǵan beıne Memlekettik ortalyq mýzeıge qoıylǵan bolatyn. 2009, 2012 jyldary Almaty oblysyndaǵy Jambyl aýdanyndaǵy Qoǵaly shatqalynda aralyǵy birneshe júz metr bolatyn 2 jerden biregeı beıneler tabylyp otyr», - deıdi tarıh ǵylymdarynyń kandıdaty A.Rogojınskıı.
