Almaty oblysynda etti mal sharýashylyǵy forýmy bastaldy

TALDYQORǴAN. QazAqparat - Almaty oblysynyń Alakól aýdanynda «Lepsi-2019» atty etti mal sharýashylyǵynyń respýblıkalyq forýmy bastaldy. Shara óńirdiń eń iri sharýashylyǵy - «Arqarly Maıbúırek» seriktestigi bazasynda ótip jatyr, dep habarlaıdy QazAqparat tilshisi.

Jıynnyń basty maqsaty - Qazaqstanda etti mal sharýashylyǵyn damytý, mal basyn asyldandyrý jáne et eksporty potentsıalyn arttyrý.

Basqosýǵa QR Aýyl sharýashylyǵy mınıstrligi ókilderi, Qazaqstannyń et odaǵy, Aqbas, Gereford, Angýs asyl tuqymdy sıyr palatalary, et óndirýshiler men sharýashylyq basshylary qatysýda.

Forýmnyń alǵy sózin Alakól aýdanynyń ákimi Álibek Jaqanbaev alyp, óńirdiń aýyl sharýashylyǵy jaǵdaıymen tanystyrdy.

«Aýdan ekonomıkasynyń negizin quraıtyn aýyl sharýashylyǵy salasynda 2018 jyly jalpy óndirilgen aýyl sharýashylyǵy óniminiń kólemi 35 mlrd 636 mln teńgege jetti. Salaǵa 1 mlrd 562 mln teńge ınvestıtsııa tartyldy. 2018 jyly mal sharýashylyǵy salasynda 18 myń tonnaǵa jýyq et, 37 myń tonna sút, 435 tonna bal, 742 tonna balyq, 400 tonna suıyq maı óndirildi. Aýdan sharýalary shyǵarǵan ónimderiniń 4 túri - 200 tonna et, 138 tonna balyq (súbe), 4,2 tonna bal, 400 tonna suıyq maı alys - jaqyn shetelge eksporttaldy», - dep atap ótti aýdan basshysy.

Forým eki kúnge jalǵasady. Qonaqtar Alakóldegi iri sharýashylyqtarda bolyp, mal kórmesine qatysady. Sondaı-aq alǵash ret asyl tuqymdy mal aýktsıony ótip, jınalǵan qarjy qaıyrymdylyq sharalaryna jumsalmaq.