Almaty oblysynda et pen sút óndirisi damýda

TALDYQORǴAN. QazAqparat - Almaty oblysynyń Jambyl aýdanynda «100 naqty qadam» Ult josparynyń 60 jáne 61 qadamdarynda sút pen et óndirisin damytý jóninde tapsyrmalardy oryndaý baǵytynda júıeli jumystar jasalyp keledi.

 Ótken jyly 21 myń 913 tonna et, 39 myń 668 tonna sút óndirilip, jospar asyra oryndaldy. Bul týraly Jambyl aýdanynyń ákimi Jandarbek Dalabaev óziniń turǵyndar aldynda bıylǵy jylǵy alǵashqy esep berý jıynynda aıtty, dep habarlaıdy QazAqparat Almaty oblysy ákiminiń baspasóz qyzmetine silteme jasap.

J. Dalabaevtyń aıtýynsha, óńirdegi 3 myń basqa arnalǵan «Imperııa Fýd» JShS-nyń mal sanyn aldaǵy ýaqytta 10 myńǵa deıin arttyrý kózdelýde. Oǵan qosa qýattylyǵy 5000 tonnalyq, jalpy quny 288 mln. teńgelik astyq qoımasyn salý jumystary júrgizilýde. Onyń 224 mln. teńgesi - «Kazagrofınans» AQ-nyń, 64 mln. teńgesi - kompanııanyń óz qarjysy. Atalmysh mal bordaqylaý alańy búginge deıin 2607 bas iri qara malyn bordaqylap, 1013 tonna et, nemese 968 mln. teńgeniń ónimin óndirgen, al bıylǵy jylǵy meje - 1,5 myń tonna. Irandyq bul kompanııa Qasymbek aýylynda quny 2 mlrd. 300 mln. teńge bolatyn et óńdeý zaýytynyń qurylysyn júrgizýde, zaýyt osy jyldyń birinshi jartysynda iske qosylady.

Sonymen qatar aýdannyń Qaraqystaq aýylyndaǵy «Tabys» sharýa qojalyǵy 600 basqa arnalǵan, jalpy quny 1 mlrd. 780 mıllıon teńge turatyn sút- taýarly fermasyn salyp, Ýkraınadan asyl tuqymdy sıyr malyn satyp alý jumystaryn júrgizýde. Sharýashylyq tolyq qýatymen jumys istegende jylyna 6,0 myń tonna sút óndiretin bolady. Osyǵan baılanysty atalǵan kásiporyn qýattylyǵy 5,0 myń tonnalyq sút óńdeý zaýytyn salý jumysyn qolǵa aldy.

Jambyl aýdany oblys boıynsha qoı men eshki ósirýden 1-inshi, iri qara, jylqy jáne túıe ósirýden 2-inshi, qus sany boıynsha 5-inshi oryn alady.