Almaty oblysynda esepte turǵan jetkinshekter túrmedegilerdiń ómirimen tanysty
TALDYQORǴAN. QazAqparat - Almaty oblysyndaǵy Eskeldi aýdanynda esepte turǵan jetkinshekter túrmedegilerdiń ómirimen tanysty. Prokýrorlar 13 oqýshyny Almaty qalasyndaǵy LA 155/6 kolonııasyna arnaıy apardy, dep habarlaıdy QazAqparat tilshisi.
Túzeý mekemesinde kámelettik jasqa tolmaǵan 50-ge jýyq bala jazasyn ótep jatyr. Olarǵa taǵylǵan aıyp ár túrli. Biri urlyq jasasa, endi bireýleri kisi óltirip, dinı teris aǵymdy nasıhattap sottalǵan. Olardyń biri jasaǵan áreketine qatty ókinetinin aıtyp, qonaqqa kelgen qatarlastaryna durys júrýge keńes berdi.
Eskeldi aýdanynyń prokýrorlary bul sharany ishki ister bóliminde tirkeýde turǵan jasóspirimder sottalǵan zamandastarynyń qatelikterin qaıtalamaýy maqsatynda uıymdastyrdy. Temir tordyń ar jaǵyndaǵy tirshilikten sabaq alǵan oqýshylar, bolashaqta tártip buzbaı, durys júrip-turýǵa belin bekem býyp qaıtatyny da anyq.
