Almaty oblysynda energetıkalyq sýsynnyń kesirinen er adam jansaqtaý bólimine tústi
QONAEV. QazAqparat - Naýqas Almaty qalalyq kópsalaly klınıkalyq aýrýhanasynyń jansaqtaý bólimine shuǵyl túrde jatqyzyldy. Ol keýde tusynyń aýyrsynýyna shaǵymdandy, dep habarlaıdy QazAqparat tilshisi.
«Týystarynyń aıtýynsha, ol sońǵy tórt jylda kún saıyn energetıkalyq sýsyndar ishken. Tolyq tekserýden keıin dárigerler naýqasqa sozylmaly júrek jetkiliksizdigi dıagnozyn qoıdy. Bul júrektiń soǵý fýnktsııasy buzylyp, organdar men tinderge otteginiń jetispeýshiliginen zardap shegetin jaǵdaı», - dep habarlady Almaty oblystyq densaýlyq saqtaý basqarmasynan.
Qazir naýqastyń jaǵdaıy óte aýyr, jansaqtaý bóliminde jasandy tynys alý apparatynda jatyr.
Dáriger energetıkterdiń quramynda kofeınniń kóp dozasy baryn eske saldy.
Aıtýynsha, bul júrektiń aýyr problemalaryna ákelýi múmkin, al onyń kómirqyshqyl gazynyń qantpen úılesýi asqazan men baýyr úshin qaýipti.
«Energetıkalyq sýsyndardy tutyný arterııalyq gıpertenzııaǵa, mıgrenge, júrek rıtminiń buzylýyna, asqazan-ishek joldarynyń problemalaryna ákeledi. Sondaı-aq, psıhomotorlyq qozýdy, titirkenýdi, uıqysyzdyqty, tahıkardııany, arıtmııany, qan qysymynyń joǵarylaýyn týdyrýy múmkin», - deıdi kardıolog dáriger Muhamedjan Nuralıuly.
