Almaty oblysynda elektr energııasynyń tarıfi basqa aımaqtarmen salystyrǵanda áldeqaıda joǵary - senator N. Súleımenov
ASTANA. Qańtardyń 28-i. QazAqparat /Qanat Mámetqazyuly/ - Almaty oblysynda elektr energııasynyń tarıfi basqa aımaqtarmen salystyrǵanda áldeqaıda joǵary.
Búgin QR Parlamenti Senatynyń jalpy otyrysynda Úkimet basshysy Kárim Másimovtiń atyna saýal joldaǵan senator Nurlan Súleımenov osylaı málim etti, dep habarlaıdy QazAqparat.
«Búgingi kúni Almaty oblysynda elektr energııasynyń tarıfi (kVt/saǵatyna 10,27 teńge) elimizdiń basqa aımaqtarymen salystyrǵanda áldeqaıda joǵary. Jalpy respýblıka boıynsha alyp qarastyrsaq, óńirdegi tarıf 1,4 ese joǵary eken. Buǵan qosa, Almaty óńirlerindegi elektr energııasynyń qymbat baǵasyna qaramastan «KEGOS» AQ-nyń júıesi boıynsha elektr energııasynyń tranzıtine eń joǵary tarıfti bekitken. Baǵamdaǵy osyndaı aıyrmashylyqtar oblystaǵy taýar óndirýshiler ónimderiniń básekelestigin edáýir tómendetedi jáne eldiń turmys deńgeıine aıtarlyqtaı áserin tıgizedi», dedi senator.
Onyń aıtýynsha, Úkimettiń «Shekti tarıfterdi bekitý týraly» qaýlysyna sáıkes jetkizýshi-elektrostansylar baǵasynyń kóterilýi de josparlanǵan. Bul sáıkesinshe oblys boıynsha elektr energııa tarıfiniń joǵarylaýyna ákep soǵatyn bolady. «Sondyqtan da, Almaty oblysy turǵyndarynyń áleýmettik jáne ekonomıkalyq teńdigin elimizdiń basqa óńirlerimen teńestirýdi qamtamasyz etý maqsatynda respýblıka boıynsha elektr energııasynyń biryńǵaı baǵasyna kezeńdep ótý máselesi qarastyrylýy qajet», degen depýtat osy máselede Úkimet basshysynyń qoldaýyn surady.
