Almaty oblysynda ekpe alýshylardyń kóshin ustazdar qaýymy bastap tur
Óńir boıynsha 39 289 muǵalim vaktsına saldyrǵan. Ekinshi orynda Medıtsına mamandary kele jatyr. 23 656 medıtsına qyzmetkerleri erikti túrde ekpe alǵandar sanatynda. Al, memlekettik qyzmetkerlerge keler bolsaq, indetke qarsy vaktsına alǵandarynyń sany - 12 253 adam.
«Búgingi tańda koronavırýs ınfektsııasyna qarsy ekpeniń birinshi bóligin óńirdegi 653 349 myń adam alsa, ekinshi komponentin 523 781 turǵyn qabyldap úlgerdi. Vaktsına - koronavırýstan qorǵanýdyń jalǵyz joly», - delingen oblystyq sanıtarııalyq-epıdemıologııalyq baqylaý departamentiniń baspasóz qyzmeti taratqan habarlamada.
Vedomstvonyń aqparatyna sáıkes, Almaty oblysynda bir táýlikte 376 adam vırýs juqtyrdy. Jalpy óńirde búgingi kúnge deıin koronavırýstyń 41 222 jaǵdaıy zerthana synamasymen rastalǵan. Onyń 28 795-i sımptomdy. Qazirgi kezde 100 myń turǵynǵa shaqqanda KVI syrqattanýshylyq kórsetkishi - 1 928,6.
Sońǵy táýlikte 376 adamnan vırýs anyqtaldy. Aýrý eń kóp taralǵan aımaq qatarynda, Eskeldi, Qaratal, Panfılov, Uıǵyr, Talǵar, Kóksý aýdandary men Tekeli jáne Taldyqorǵan qalalary bar.
KVI anyqtalǵan 376 jaǵdaıdyń 295 -i sımptomdy bolsa, 81-de aýrý belgisi baıqalmaǵan.
Oblys boıynsha koronavırýstyń ósý qarqyny sońǵy eki aptada 1,1% kórsetip otyr.