Almaty oblysynda eki jasóspirimdi pyshaqtap, qashyp júrgen kúdikti ustaldy
TALDYQORǴAN. QazAqparat - Almaty oblysynda eki jasósiprimdi pyshaqtap, quqyq qorǵaý organdarynan 5 jyl boıy qashyp júrgen 20 jastaǵy kúdikti ustaldy, - dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, oqıǵa 2015 jyldyń 5-qańtarynda Almaty oblysy Talǵar aýdanynyń Jańalyq kentinde bolǵan. Almaty oblysy Jambyl aýdanynyń 20 jastaǵy turǵyny eki jasóspirimge esh sebepsiz pyshaq jaraqatyn salyp, densaýlyǵyna aýyr zııan keltirip, qylmys ornynan izin sýytqan.
Atalǵan derek boıynsha QR Qylmystyq kodeksiniń 106-baby 2-bóligi boıynsha sotqa deıingi tergeý amaldary júrgizildi. Tártip saqshylarynan boı tasalap júrgen kúdiktige izdeý jarııalanyp, sot organdary ony qamaýǵa alý týraly sanktsııa berdi. Jedel-izdestirýdiń keshendi sharalary barysynda oblystyq jáne aýdandyq krımınaldyq polıtsııa jedel ýákilderi kúdiktini Taldyqorǵan qalasynda qolǵa túsirdi. Tergeý kezinde osy ýaqytqa deıin onyń elimizdiń ártúrli aımaqtarynda turǵany jáne resmı jumysqa ornalasýdy talap etpeıtin jerlerde jumys istegeni belgili boldy.
«Kúdikti oblys ortalyǵyna birneshe kún buryn ǵana kelgeni anyqtaldy. Sotqa deıingi tergeý kezinde kúdiktiniń Almaty men Almaty oblysynda ashylmaǵan basqa da qylmystarǵa qatystylyǵy tekseriledi. Qylmystyq is boıynsha basqa derekter QR QPK-niń 201-babyna sáıkes jarııa etýge jatpaıdy»,- delingen oblystyq polıtsııanyń baspasóz qyzmeti taratqan habarlamada.
