Almaty oblysynda eki mas adam otyrǵan kólik sanıtarlyq beketke toqtamaı ótip ketken
TALDYQORǴAN. QazAqparat - Almaty oblysyndaǵy Alakól aýdanynyń polıtseıleri tótenshe jaǵdaı kezinde birden 6 quqyq buzýshylyq jasaǵan eki er adamdy ustady, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, keshe saǵat 22.00 shamasynda Kólbaı aýylynda turatyn 48 jastaǵy adam ishimdik ishkennen keıin «Ij2715» avtokóligin basqarýǵa bergen 59 jastaǵy dosy kórshi aýyldan Kólbaı aýylyna jolǵa shyqqan. Eldimekenge kele jatyp, olar «Almaty-Óskemen» avtojolynyń 480-shaqyrymynda ornalasqan sanıtarlyq bekette polıtsııa qyzmetkerleriniń aıaldaý týraly zańdy talabyn oryndamaı, óte shyqqan.
Keıin qabyldanǵan sharalar nátıjesinde tártip buzýshylar mingen kólik toqtatyldy. Alaıda, rólde otyrǵan er adam bılik ókiline baǵynbaı, al onyń jolaýshysy polıtseılerdi balaǵattaǵan. Osyǵan oraı QR Qylmystyq kodekstiń 379, 378-baptaryna sáıkes «bılik ókiline baǵynbaý», «bılik ókilin qorlaý» boıynsha sotqa deıingi tergeý amaly bastaldy. Medıtsınalyq kýálandyrý barysynda eki azamattyń da mas kúıde ekeni anyqtaldy. Kúdiktiler ýaqytsha ustaý oqshaýlaǵyshyna qamaldy.
Sonymen qatar, olardyń árqaısysyna QR ÁQBtK-niń 476-baby boıynsha tótenshe jaǵdaı rejımin buzǵany úshin ákimshilik hattama toltyryldy. Kólik ıesi ishimdik ishken azamatqa kóligin basqarýdy tabystaǵany úshin, ekinshisi kólik quralyn mas kúıde basqarǵany úshin QR ÁQBtK 608-baby boıynsha jaýapkershilikke tartyldy. Qazir kólik arnaıy turaqqa qoıyldy.
