Almaty oblysynda eki kúnde mal urlyǵynyń 39 deregi ashyldy
TALDYQORǴAN. QazAqparat - Almaty oblysynyń tártip saqshylary «Mal urlyǵy» respýblıkalyq aldyn alý is-sharasy barysynda eki táýlik ishinde mal urlyǵynyń 39 deregin áshkereledi.
Onyń 30 deregi buǵan deıin jasalǵan qylmys bolsa, onyń ishinde on úsh mal urlyǵy «burynǵy jyldar» sanatyna jatady, dep habarlaıdy QazAqparat tilshisi.
«Respýblıkalyq is-shara 14-16 mamyrǵa josparlanǵan. Eki kún ishinde oblysta 9 mal urlyǵy tirkelip, 17 bas mal qoldy bolǵan. Polıtseılerdiń jedel izdestirý sharalary barysynda qylmystardyń barlyǵy izi sýymaı ashylyp, barlyq mal óz ıelerine qaıtaryldy. Aıta keteıik, buǵan deıin jasalǵan qylmystardy ashý kezinde Eńbekshiqazaq, Talǵar jáne Kerbulaq aýdandarynyń polıtseıleri jaqsy nátıje kórsetti»,- dep málimdedi Almaty oblysy Polıtsııa departamentiniń baspasóz qyzmeti.
Jyl basynan beri polıtseıler oblys aýmaǵynda mal urlyǵyn kásip qylǵan kánigi urylardyń 34 tobyn quryqtaǵan. Olardyń 96 qylmysqa qatysy bary anyqtalyp, sáıkesinshe aıyp taǵyldy.
«Birneshe kún buryn 4 adamnan quralǵan urylar toby ustaldy. Olar byltyrǵy qyrkúıekten beri 80 bas jylqyny qoldy qylǵan. Іzdestirý sharalary barysynda tártip saqshylary 43 jylqyny taýyp, ıelerine qaıtaryp berdi. Sondaı-aq, urlanǵan maldy satyp alýshylar men satý oryndary da áshkere boldy. Polıtseıler urylarmen qatar, satyp alýshylardy da jaýapqa tartýǵa múddeli. Qazirgi ýaqytta sotqa deıingi tergeý amaldary jalǵasýda»,- dep atap ótti vedomstvonyń baspasóz qyzmeti.
