Almaty oblysynda eki kólik betpe-bet soǵysyp, bir adam kóz jumdy
TALDYQORǴAN. QazAqparat - Almaty oblysynda «Almaty - Kókpek - Kóktal» tasjolynda eki kólik betpe-bet soǵysyp, bir adam kóz jumdy. Taǵy bir jolaýshy aýrýhanaǵa tústi, dep habarlaıdy QazAqparat tilshisi.
Atalǵan kólik apatyna baılanysty Almaty oblystyq polıtsııa departamentiniń baspasóz qyzmeti málimet taratty.
«Oqıǵa búgin 06:40 shamasynda «Almaty- Kókpek-Kóktal» tasjolynyń 65-shi shaqyrymynda bolǵan. Anyqtalǵandaı, «Mitsubishi galant» mashınasynyń júrgizýshisi kólik tizginine ıe bola almaı, qarsy baǵytqa shyǵyp ketken. Ol 41 jastaǵy azamat júrgizip kele jatqan «Mercedes benz sprinter» mashınasyna betpe-bet soǵylǵan. Saldarynan qarsy baǵytqa shyǵyp ketken kóliktiń 26 jastaǵy júrgizýshisi oqıǵa ornynda kóz jumdy. Sondaı-aq onyń 45 jastaǵy jolaýshysy túrli dene jaraqatymen aýrýhanaǵa tústi» delingen atalǵan vedomstvonyń resmı habarlamasynda.
Qazir atalǵan fakti boıynsha QR QK 345-baby boıynsha qylmystyq óndiris qozǵalyp, sotqa deıingi tergeý júrip jatyr.
