Almaty oblysynda eki balanyń máıiti sandyqtan tabyldy
TALDYQORǴAN. QazAqparat - Almaty oblysynda eki balanyń máıiti sandyqtyń ishinen tabyldy. Oqıǵa Eńbekshiqazaq aýdanynyń Aşysaı aýylynda bolǵan, dep habarlaıdy QazAqparat tilshisi.
2007 jáne 2008 jylǵy balalardyń neden qaıtys bolǵany ázirge belgisiz. Qazir sandyqtyń ishinen tabylǵan máıitterdiń deregi boıynsha tergeý bastaldy.
"Atalǵan jaıtqa baılanysty barlyq qajetti saraptama taǵaıyndaldy. Balalardyń neden ólgenin saraptama nátıjesi anyqtaıtyn bolady", - dedi oblystyq ІІD baspasóz qyzmetiniń ókili Kóbeıhan Nurahmetov.
Aıta ketý kerek, qaıtys bolǵan qos búldirshin - eki otbasynyń balasy. Bir-birine kórshi turady. Ózge BAQ ókilderiniń málimetinshe, olardyń ata-analary balalaryn bireý óltirip, ákep tastady dep kúdiktenedi. 14 mamyr kúni joǵalǵan balalardyń óli denesi kelesi kúni eski úıdegi sandyqtyń ishinen tabyldy.
