Almaty oblysynda eki áıel oqýshy qyzdy soqqyǵa jyqty
TALDYQORǴAN. QazAqparat - Almaty oblysynda oqýshy qyzdy eki áıel uryp ketti. Taıaq jegen jábirlenýshi qazir aýrýhanada jatyr, dep habarlaıdy QazAqparat tilshisi.
Almaty oblystyq polıtsııa departamentiniń baspasóz qyzmeti oqıǵany rastady. Al kúdiktilerdi tártip saqshylary izdestirip jatyr.
Oqıǵa Іle aýdanynyń Boraldaı aýylynda bolǵan.
13 mamyr kúni saǵat 18:35 shamasynda aıaldamada eki áıel kámelet jasyna tolmaǵan qyzdy uryp, sodan keıin taksıge minip qashyp ketken.
Aldyn ala boljam boıynsha taraptar arasynda kıkiljiń bolýy múmkin.
«Qazir 16 jastaǵy qyz Almaty qalasyndaǵy №1 balalar aýrýhanasyna jetkizildi. Bul fakti Іle aýdanynyń polıtsııasynda tirkeldi. Qazir kúdiktilerdi jedel izdestirý jumysy júrgizilip jatyr» delingen vedomstvonyń habarlamasynda.
