Almaty oblysynda eki aı buryn mal izdeýge shyqqan azamattan áli habar-oshar joq
TALDYQORǴAN. QazAqparat - Almaty oblysy Aqsý aýdany, Qopa aýylynyń turǵyny Abaı Asýbaıuly 1-shi tamyzda mal izdeýge ketip, sodan oralmaǵan.
Uldarynyń amandyǵyn tilegen ata-anasy áli kúnge Abaıdyń ne tiri, ne óli ekenin bilmeı dal.
Abaıdyń ákesi mal izdeýge ketken ulynyń sońǵy ret «Daıyn» sharýa qojalyǵynyń mańynan qońyraý shalǵanyn aıtady.
- «Qońyraý shaldy, sheshesine. Meni surapty. Sol kezde maǵan telefondy alyp kelgenshe óship qaldy. Saǵat 18:20-da telefon sóndi, sodan keıin ulymyzdan aıyrylyp qaldyq. Óltirip ketti me, laqtyryp ketti me, sony teksere almaı jatyr. Sol kórshi qystaqtan kúdiktenip otyrmyz, «Daıyn» sharýa qojalyǵynan. Sebebi, sol mańnan ulym zvondady»,- deıdi Abaıdyń ákesi Asýbaı Qımbaev.
Ákesi ulynyń bir urlyqtyń ústinen túsip, sol úshin jazalandy ma degen paıymy da bar. Degenmen, ata-anasy joǵalǵan uldary týraly aryzdanǵanymen, sol sátte izdeý júrgizgen quzyrly organnyń jumystaryna kóńili tolmaı otyr.
«Eki saǵattaı ǵana izdeý júrgizip, artynsha janarmaıymyz taýsyldy dep ketip qalǵan qutqarýshylardyń tikushaǵy óz aldynda, tipti Abaı mingen attaǵy ertoqymdy 20 kúnnen keıin ǵana aıǵaq zat retinde tekserýge alyp otyr. Bálkim erterek sol ertoqymdy alyp, teksergende bir ushyǵy tabylar ma edi», - deıdi Abaıdyń ákesi. Qazir Asýbaı Qımbaevtyń kómek surap, qaqpaǵan esigi qalmaǵan. Qolushyn berip, izdeý jumystaryna jumyla kirisken aǵaıyndar sany birshama bolǵanymen ázirge nátıjesiz. Ata-ana 19 jastaǵy ulyn óldi degenge qımaıdy, úmitin úzbeıdi.
Aıta keterligi, Abaı Aqsý aýdany Qopa aýylynan joǵalyp otyrǵan birinshi adam emes. Jyl basynda Maýzaıhan Álimhan esimdi azamat iz-tússiz joǵalyp, áli kúnge deıin tabylǵan joq.
