Almaty oblysynda eki aýrýhananyń basshysy jazalandy
ASTANA. QazAqparat - QR Densaýlyq saqtaý mınıstrligi Qoǵamdyq densaýlyq saqtaý komıteti Almaty oblysyndaǵy mindetti talaptardy saqtamaǵan 2 medıtsınalyq uıymǵa qatysty shara qabyldady, dep habarlaıdy QazAqparat tilshisi mınıstrliktiń baspasóz qyzmetine silteme jasap.
Qarasaı aýdanynyń Qaskeleń qalalyq juqpaly aýrýlar aýrýhanasyna jospardan tys tekserý júrgizilgen. Osydan keıin aýrýhana dırektoryna qatysty QR ÁQBtK-niń 425-baby 1-bólimi boıynsha jáne eki bólim meńgerýshisine qatysty 80-baby 1-bólimi boıynsha ákimshilik shara qabyldandy.
«Tekserý qorytyndysy boıynsha «Áleýmettik medıtsınalyq saqtandyrý qory» KEAQ Almaty fılıaly sapasyz medıtsınalyq qyzmet kórsetkeni úshin 2 mln 345 myń teńge kóleminde aıyppul saldy. Qaıta tekserý kezinde uıǵarymnyń 2 tarmaǵy oryndalmaǵany anyqtaldy. Materıaldar shara qabyldaý úshin Qaskeleń qalasynyń ákimshilik sotyna jiberildi. Qarasaı mamandandyrylǵan ákimshilik sotynyń 2018 jylǵy 23 qarashadaǵy qaýlysymen aýrýhana dırektoryna 15 AEK kóleminde aıyppul salyndy», - delingen mınıstrliktiń habarlamasynda.
Aıta keterligi, ótken jyly Almaty oblysynyń ákimi Qaskeleń qalalyq juqpaly aýrýlar aýrýhanasyn Qarasaı aýdandyq ortalyq aýrýhanasyna qosý týraly qaýly shyǵarǵan edi. Qazirgi ýaqytta aýrýhana qaıta qurylyp, Qarasaı aýdandyq ortalyq aýrýhanasy quramyna kirgizilgen. Bul rette aýrýhanalarda ákimshilik bóliginen basqa kózdelgen shtat birligi saqtalǵan.
«2018 jyldyń sáýir aıynda Eńbekshiqazaq aýdany Shelek aýylyndaǵy aýdandyq aýrýhanany tekserý barysynda ǵımarattyń sanıtarlyq-tehnıkalyq jaǵdaıy, sýmen jabdyqtaý, káriz jáne jeldetý júıelerinen aqaý tabylǵan bolatyn. Tekserý nátıjeleri boıynsha 10 laýazymdy tulǵaǵa aıyppul túrinde ákimshilik shara qabyldanǵan. Sondaı-aq, 2018 jylǵy 27 jeltoqsanǵa deıin kemshilikterdi joıý týraly uıǵarym berilgen. Nusqamany oryndaý boıynsha tekserý osy jyldyń qańtar aıynda júrgizildi. Tekserý barysynda 27 tarmaqtyń 13-i oryndalmaǵany belgili boldy. Atap aıtqanda, kúrdeli jóndeý júrgizý, jeldetý júıesiniń jumys isteýin qamtamasyz etý, kir jýý ornyn jabdyqtaý, ashanadaǵy kem-ketik ydystardy aýystyrý, sondaı-aq naýqastardy ınfektsııalyq aýrýlardyń jekelegen túrlerine tekserý jáne ınfektsııalyq baqylaý komıssııasynyń jumysy boıynsha kemshilikter sol kúıi rettelmegen», - delingen habarlamada.
Aýrýhana dırektorynyń orynbasaryna uıǵarymdy oryndamaǵany úshin QR ÁQBtK 462-babynyń 3-tarmaǵy boıynsha Ákimshilik quqyq buzýshylyq týraly hattama toltyryldy (burynǵy dırektor jumystan bosatyldy). Tekserý materıaldary shara qoldaný úshin Eńbekshiqazaq aýdandyq №2 sotyna jiberilip, qazirgi ýaqytta materıaldar qarastyrylýda.
Esterińizge sala keteıik, 2018 jyldyń 6 maýsymynda QR Densaýlyq saqtaý mınıstri Eljan Birtanov Qaskeleń qalalyq juqpaly aýrýlar aýrýhanasynda bolyp, densaýlyq saqtaý jáne halyqtyń sanıtarııalyq-epıdemıologııalyq salaýattylyǵy salasyndaǵy zańnama talaptarynyń saqtalýyna jospardan tys tekserý júrgizýdi tapsyrǵan bolatyn.
