Almaty oblysynda dosyn óltirip, denesin monshaǵa kómgen kúdikti ustaldy
TALDYQORǴAN.QazAqparat - Almaty oblysynda dosyn óltirip, denesin jańadan salynyp jatqan monshanyń ishine kómgen kúdikti ustaldy. Qylmys ornynan qashyp ketken azamat ózge oblys aýmaǵynda qolǵa túsken, dep habarlaıdy QazAqparat tilshisi.
Almaty oblystyq polıtsııa basqarmasy baspasóz qyzmetiniń málimetinshe, oqıǵa Esik qalasynda bolǵan. Mert bolǵan 31 jastaǵy azamat jeke úıiniń jóndeý jumystaryna kómektesý úshin tanysyn shaqyrǵan. Túnde eki dostyń arasynda janjal týyndap, 34 jastaǵy jigit tanysyn óltirgen. Qylmystyq áreketin jasyrý maqsatynda marqumnyń denesin qurylysy aıaqtalmaǵan monshasynyń ishine kómip, edendi betonmen quıyp tastaǵan. Oqıǵa ornynan belgisiz baǵytta boı tasalaǵan.
«Jedel izdestirý sharalary barysynda tártip saqshylary kúdiktini Túrkistan oblysy aýmaǵynda qolǵa túsirdi. Qazirgi tańda ol Eńbekshiqazaq aýdanynyń ýaqytsha ustaý oqshaýlaǵyshyna qamaldy. Bul faktige qatysty QR Qylmystyq kodeksiniń 99-babyna sáıkes sotqa deıingi tergeý amaldary júrgizilýde»,- dep málim etti polıtsııa basqarmasynyń baspasóz qyzmetinen.
