Almaty oblysynda depýtat pen balasy para berdi degen kúdikke ilindi
Bul týraly Astanada ótken brıfıngte QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Janna Bastarova málim etti, dep habarlaıdy QazAqparat.
«Aǵymdaǵy jyldyń 10 qazan kúni Sybaılas jemqorlyqqa qarsy is-qımyl ulttyq bıýrosynyń Almaty oblysy boıynsha departamenti Taldyqorǵan qalasynda oblystyq aýyl sharýashylyǵy basqarmasynyń basshysyn ustady. Ol merdiger uıymnyń basshysynan kelisimshart boıynsha atqarylǵan jumystardyń aktisine kedergisiz qol qoıý úshin 5,5 mln teńge kóleminde para aldy dep kúdiktelýde», - dedi resmı ókil.
Tergeý barysynda para bergen oblys máslıhatynyń depýtaty men onyń balasy ekeni anyqtaldy.
«Sol kúni Almaty oblysynyń aýyl sharýashylyǵy basshysy ustalyp, ýaqytsha ustaý oqshaýlaǵyshyna jetkizildi. Sondaı-aq, para bergeni úshin depýtattyń uly ustalyp, ol da ýaqytsha ustaý oqshaýlaǵyshyna qamaldy. Aǵymdaǵy jyldyń 12 qazanynda Taldyqorǵan qalasynyń arnaıy tergeý sotynyń sanktsııasymen atalǵan adamdarǵa qatysty kúzetpen ustaý túrindegi bultartpaý sharasy qoldanyldy. Egde jasta bolýyna oraı jáne densaýlyq jaǵdaıyna baılanysty oblystyq máslıhat depýtaty qamaýǵa alynǵan joq. Atalǵan faktiler boıynsha sotqa deıingi tergep-tekserý jalǵasýda», - dep naqtylady Janna Bastarov.
Budan buryn habarlanǵandaı, Agenttik bir aptanyń ishinde para alý kúdigimen ustalǵandardy jarııa etti. Sondaı-aq, belgili bolǵanyndaı, Ózbekstandaǵy Qazaqstan elshisi bıýdjet qarajatyn jymqyrý boıynsha kúdikke ilindi.