Almaty oblysynda Dánesh Raqyshevtyń 90 jyldyǵyna arnalǵan eske alý keshi ótti

Táýelsizdiktiń 25 jyldyǵymen tuspa-tus kelgen mereıtoıǵa jınalǵan jurt jeltoqsan qaharmandaryn da eske aldy.
 

Azattyq jolynda qurban bolǵan Lázzat Asanova men Erbol Sypataevtyń eskertkishine gúl shoqtaryn qoıyp, rýhyna taǵzym etti. Budan keıin qonaqtar Dánesh Raqyshevtyń ómiri men shyǵarmashylyǵyna arnalǵan kórmeni tamashalady. Onda Berik Ábilhanov esimdi azamat ánshige arnalǵan memorıaldyq keshenniń joqtyǵyn eskerip, arnaıy joba ázirlegendigin aıtty. Ony aýdandyq óner mektebiniń aldyna qoısa degen usynysyn bildirdi.

Torqaly toıda Jarkenttegi ortalyq kósheni Dánesh esimimen almastyrý kerektigi kóterildi. Sonda aýdannyń qos báıteregi Ábilhan Qasteev pen Dánesh Raqyshevtyń atymen atalatyn kósheler túıisip, qonaqtardy qushaq jaıa qarsy alǵandaı áser qaldyrady,- dedi jazýshy Beksultan Nurjekeev.



Uly tulǵany ulyqtaý sharasynda qonaqtardy aýdan ákimi Berdáýlet Abdýldaev quttyqtap, «Dánesh bir týar dara tulǵa» atty baıandama jasady. Al oblystyq mádenıet, muraǵattar jáne qujattama basqarmasynyń basshysy Aqan Ábdýálıev oblys ákiminiń ystyq yqylasyn jetkizdi. Óńirde Dánesh atamyzdyń torqaly toıyna oraı ótkizilgen sharalardy tizbektep berdi. Soǵan uıytqy bolǵan Nurjan Janpeıisovpen Gúlnár Dáneshqyzyna alǵys hattaryn tabys etti.

 

QR halyq ártisi, ánshi, sazger Dánesh Raqyshev - halyqtyq ónerdiń injý-marjanyn boıyna sińire bilgen erekshe talant ıesi. Kúlli qazaq dalasyn ásem ánimen áldıledi. Onyń óleńderi elimizben qatar Qytaı, Mońǵolııa, Qyrǵyzstan syndy memleketterdiń de aspanynda qalyqtaǵan. Jeztańdaı ánshi ǵasyrlar boıy qalyptasqan baı, mádenı, rýhanı muramyzdyń tolyǵýyna da súbeli úles qosty. Ol halyq sazgeri Áset Naımanbaevtyń shyǵarmalaryn elge ákelip qaıta jańǵyrtty.