Almaty oblysynda byltyr 3 myńǵa jýyq adam qaterli isik aýrýlaryna shaldyqqan
TALDYQORǴAN. QazAqparat – Almaty oblysynda byltyr qaterli isik aýrýlaryna shaldyqqan 2835 naýqas tirkelgen, dep habarlaıdy QazAqparat tilshisi «Jetisu Media» aqparattyq alańynyń habarlamasyna silteme jasap.
Jyl boıy jalǵasyn tapqan profılaktıkalyq em-sharalarynyń statıstıkasyn alyp qarasaq, qaterli aýrýdan kóz jumatyndardyń sany 59,9% qurap otyr. Oblystyq kópsalaly klınıka dırektory Danııar Orazbekulynyń aıtýynsha, bul kórsetkish 2018 jylmen salystyrǵanda 2,1 % tómendegen. Sonymen qatar ómir súrý merzimin 5 jylǵa uzartý 54,9% kórsetip tur. Qaterli isik kúnnen kúnge jasaryp barady dep dabyl qaqqan mamandar jyl saıyn turaqty túrde «ashyq esik» kúnderin ótkizedi. Sondaı-aq aýyldyq, onyń ishinde shalǵaı eldi mekenderge kóshpeli mobıldi mamandar tobyn jiberip, aýrýdyń aldyn alý joldaryna kirisken. Máselen, Tekeli qalasy, Qaratal jáne Sarqan aýdandarynda 374 turǵyndy tekserýden ótkizip, onyń ishinde 75 adamnan ár túrli aýrýlardyń patologııalyq belgilerin anyqtaǵan.
