Almaty oblysynda bútin bir otbasy joǵalyp ketti
ALMATY. QazAqparat - Almatyda bes adamnan turatyn otbasy joǵalyp ketti. Olardyń izdestirilip jatqany týraly aqparatty qoǵam belsendisi Islam Ýgýshev Facebook paraqshasynda jazdy, dep habarlaıdy QazAqparat tilshisi.
Onyń jazýynsha, 41 jastaǵy Andreı men 39 jastaǵy Natalıa Chýrýlınder jáne olardyń úsh balasy - Angelına (12 jasta), Davıd (9 jasta) jáne Danııl (7 jasta) joǵalyp ketken. Barlyǵynyń estý qabiletteri nashar. Otbasy 4 tamyzdan beri baılanysqa shyqpaǵan.
«Turatyn jerlerinde eshkim esik ashpaıdy, kórshileri de otbasynyń qaıda ekenin bilmeıdi. Erekshe belgileri - eresekter men balalardyń bári mylqaý, ymdasyp sóılesedi. Bir jaqqa ketetinderin aıtyp eskertpegen. Áıeli men kúıeýi 35-40 jas shamasynda. Boılary uzyn. Deneleri iri. Shashtarynyń túsi ashyq», - dep jazdy ol.
Chýrılınder otbasy týystarymen sońǵy ret 3 tamyzda sóılesken. 4 tamyzda áleýmettik jelige kirgen. Otbasynyń jaqyndary Alataý aýdanynyń polıtsııasyna júgingen.
Almaty polıtsııasy otbasynyń izdestirilip jatqanyn rastady.
«Joǵalǵan otbasy týraly aryz Alataý aýdandyq polıtsııa bólimine keshe keshkisin tústi. Dereý jedel-tergeý toby quryldy, onyń quramynda aýdandyq jáne qalalyq deńgeıdegi krımınaldyq polıtsııa ókilderi bar. Qazirgi ýaqytta tehnıkalyq quraldardy qoldana otyryp, otbasynyń boljamdy ornalasqan jeri anyqtalýda. Olardyń din aman ekenine senimdimiz. Týystarynyń aıtýynsha, otaǵasy men onyń otbasy músheleri taza aýda serýendegendi jaqsy kóredi. Múmkin olar Almaty oblysynyń aýmaǵyna demalýǵa ketip, týystaryna eskertý jasaýdy umytyp ketken shyǵar. Qalaı bolǵanda da, oqıǵa jaqsy aıaqtalatynyna úmittenemiz. Anyqtalǵannan keıin qosymsha aqparat beriledi», - dedi Almaty qalalyq Polıtsııa departamentiniń baspasóz qyzmetinen.
