Almaty oblysynda brend ishimdikterdi qoldan jasaıtyn tseh anyqtaldy

TALDYQORǴAN. QazAqparat – Almaty oblysynda túrli brendke aınalǵan ishimdik túrlerin qoldan jasaǵan tseh tabyldy. Arnaıy organnyń bergen beınejazbasynda ishimdiktiń qalaı jasalatynyn da kórýge bolady, dep habarlaıdy QazAqparat tilshisi.

Vıdeoda bes lıtrlik kir polıetılen bótelkesinen birneshe tútikshe arqyly «Zerno» markaly qumyranyń bótelkesine belgisiz zattyń quıylyp jatqanyn kórýge bolady.

Almaty oblysy boıynsha Ekonomıkalyq tergeý departamentiniń qyzmetkerleri júrgizgen tekserý barysynda jasyryn tsehtan 115 dana aktsızdik marka tabylǵan. ıAǵnı, araqty qoldan jasaıtyndar arnaıy markany bótelkege jabystyryp, týra túpnusqadaǵydaı etip daıyndaǵan.

«Alkogol óniminiń 30-dan astam tanymal markalary («Belenkaıa», «Vozdýh», «Zerno», «Aıdabolskaıa» jáne t.b.) jalǵa alynǵan úı-jaıda, las jaǵdaıdaǵy jasyryn tsehta daıyndalǵan. Ol araqtar Almaty oblysy men Almaty qalasynyń kóterme saýda bazarlarynda zaýyttyq ónim túrinde satylǵan. Tsehty tekserý nátıjesinde 115 dana jasandy aktsızdik markalar, 460 bótelke jasandy araq, 300 lıtr spırt jáne 65 lıtr daıyn alkogol ónimi tabyldy», - dedi Almaty oblysy boıynsha Ekonomıkalyq tergeý departamentiniń aǵa tergeýshisi Álibek Іzbasarov.

Sondaı-aq, qoldan jasalǵan alkogol ónimderin daıyndaýǵa jáne quıýǵa arnalǵan zattar tárkilendi.

«Bul faktige sáıkes Almaty oblysy boıynsha Ekonomıkalyq tergeý departamentimen QR Qylmystyq Kodeksiniń 233-baby 2-bólimi boıynsha qylmystyq is (kórineý jalǵan aktsızdik tańbalardy jáne (nemese) esepke alý-baqylaý tańbalaryn ótkizý maqsatynda daıyndaý nemese satyp alý, sondaı-aq paıdalaný nemese ótkizý) tirkeldi. Qazirgi ýaqytta sotqa deıingi tergeý júrgizilýde», -dep tolyqtyrdy atalǵan vedomstvonyń baspasóz qyzmetinen.

Aıta keteıik, túrli ishimdik túrlerin daıyndaýmen aınalysqan jasyryn tseh Qarasaı aýdanynan tabyldy.