Almaty oblysynda boıjetkendi burynǵy jigiti tereze arqyly urlap ketken
TALDYQORǴAN. QazAqparat - Almaty oblysynda jatyn bólmeniń terezesi arqyly boıjetkendi urlaǵan azamat ustaldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 27 maýsym kúni Qarasaı aýdandyq polıtsııa bólimine Shamalǵan aýylynyń 72 jastaǵy turǵyny aryzdanǵan. Ol tún ortasynda onyń 21 jastaǵy qyzyn terezeden urlap ketkenin jetkizgen. Belgisiz bireý terezeni buzyp, kúsh qoldaný arqyly boıjetkendi belgisiz baǵytqa alyp ketken.
«Jedel-izdestirý is-sharalarynyń nátıjesinde polıtsııa qyzmetkerleri «LEXUS 470« avtokóligin Qaskeleń qalasynan toqtatqan. Kólikte 21 jastaǵy boıjetken jáne ony urlady degen kúdikke ilingen Shalqar aýylynyń turǵyny bolǵan. Anyqtalǵandaı, boıjetkenniń burynǵy súıiktisi túngi ýaqytta shegelermen bekitilgen terezeni qysqysh arqyly buzyp, úıge kirgen. Dóńgelekti jóndeý úshin paıdalanylatyn bizben boıjetkendi qorqytyp, urlap ketken. Kúdiktini tártip saqshylary ustaǵanǵa deıin adam joq jerlerde birneshe ret toqtap, qyzǵanysh saldarynan boıjetkendi qolymen jáne aıaǵymen soqqyǵa jyqqan», - dedi Almaty oblysy Qarasaı aýdandyq polıtsııa basqarmasynyń bastyǵy Ashat Danııar.
Kúdikti azamat ýaqytsha ustaý oqshaýlaǵyshyna qamaldy. Odan alynǵan spıraldi biz ben terezeden tabylǵan qysqyshtar iske aıǵaqzat retinde tirkeldi. Keltirilgen dene jaraqattarynyń aýyrlyq dárejesin anyqtaý maqsatynda sot-medıtsınalyq saraptama taǵaıyndaldy. Atalǵan derek QR QK-niń 125-baby «Adam urlaý» boıynsha tirkelip, sotqa deıingi tergeý amaldary júrgizilýde.
