Almaty oblysynda bosanǵan áıel ólimine jol bergen 3 dáriger sottaldy
TALDYQORǴAN. QazAqparat - Almaty oblysynda bosanǵan áıeldiń ólimine jol bergen úsh dáriger qylmystyq jaýapkershilikke tartyldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 2018 jyldyń qazan aıynda Uıǵyr aýdanynyń ortalyǵy Shonjy aýylyndaǵy ortalyq aýrýhananyń perzenthanasynda 5 balanyń anasy 35 jastaǵy áıel bosanǵannan keıin qaıtys boldy. Atalǵan derek boıynsha QR Qylmystyq kodeksiniń 317-babynyń 3-bóligine sáıkes (medıtsına nemese farmatsevtıka qyzmetkerleriniń kásibı mindetterin oryndamaýy, tıisinshe oryndamaýy, eger bul áreketter abaısyzda adam ólimine ákep soqsa, olarǵa uqypsyz nemese josyqsyz qaraý saldarynan) qylmystyq is qozǵaldy. Sotqa deıingi tergeý amaldary tergeý bóliminiń aǵa tergeýshisi polıtsııa kapıtany F. Ilıasovqa tapsyryldy. Tergeýshi barlyq qajetti tergeý áreketterin kúrdeli saraptamalar taǵaıyndaýmen júrgizip, dárigerlerdiń kinásin dáleldedi jáne isti aıyptaý qorytyndysymen sotqa jiberdi. Birinshi sot 2020 jyldyń 27 shildesinde ótti. Alaıda, apellıatsııalyq shaǵymdy qaraǵannan keıin Almaty oblystyq sotynyń qylmystyq ister jónindegi sot alqasynyń 2020 jylǵy 24 qarashadaǵy qaýlysy iske núkte qoıdy. Sot úkimine sáıkes 63 jastaǵy dáriger-hırýrg 2 jylǵa bas bostandyǵynan aıyryldy. Oǵan kómek kórsetken 33 jastaǵy akýsher-gınekologqa úkimniń oryndalýyn 5 jylǵa keıinge qaldyra otyryp, 1 jyl 6 aı merzimge sottaldy. Ekinshi 31 jastaǵy akýsher-gınekologqa jazasyn óteýdiń barlyq merzimine probatsııalyq baqylaý belgilene otyryp, shartty túrde 1 jyl 6 aı merzimge bas bostandyǵynan aıyrý jazasy taǵaıyndaldy. Sonymen qatar, barlyq úsh dáriger 1 jyl merzimge dárigerlik jumyspen aınalysý quqyǵynan aıyryldy. Jábirlenýshiniń múddesi úshin olardan 5 000 000 teńge kóleminde moraldyq zalal óndirildi.
«Men mundaı kúrdeli isti birinshi ret tergedim, kóp jumys isteýge týra keldi. Qajetti medıtsınalyq bilimi bar tájirıbeli konsýltanttardy tartýǵa týra keldi. Olar maǵan bul isti aıaǵyna deıin jetkizýge, kinálilerdi jaýapqa tartýǵa kómektesti. Bul óz qyzmetterine salǵyrt qaraıtyn medıtsına qyzmetkerlerine jaqsy sabaq boldy dep oılaımyn. Birneshe kúrdeli, komıssııalyq sot saraptamalaryn júrgizýge baılanysty bir jyldan astam ýaqytqa sozylǵan sotqa deıingi tergeý barysynda basym kópshiligi dárigerler bolyp tabylatyn 70-ten astam kýágerden jaýap alyndy. Medıtsınalyq termınologııany túsiný úshin kóptegen medıtsınalyq ádebıetterdi oqýǵa týra keldi», - dedi polıtsııa kapıtany F. Іlııasov.
«Men qıylǵan ómirdi qaıta jalǵaý múmkin emes ekenin bilemin. Jan joldasyńnyń orny tolmaıdy. 4 balany dúnıege ákelgennen keıin, ol besinshi perzentti ómirge ákelý úshin perzenthanaǵa keldi jáne dárigerlerdiń salǵyrttyǵynan kóz jumdy. Men qatty ýaıymdadym, kináliler óz jazasyn alǵansha balalardyń kózine qaraı almadym. Іs boıynsha ádil sot sheshimin men ǵana emes, aýdan turǵyndary da kútti. Bul jerde úlken jumys atqarǵan, óziniń bilimi men joǵary kásibıligin kórsetken tergeýshiniń eńbegi, sondyqtan Farhat Іlııasovqa óz atymnan jáne barlyq týystarymnyń atynan alǵysymdy bildiremin. Densaýlyq jáne jaýapty ári aýyr eńbekte tabys tileımin», - dedi jábirlenýshi, qaıtys bolǵan áıeldiń joldasy Radýlın Samıev.
