Almaty oblysynda borannan «Saryózek-Kóktal» avtojoly jabyldy
TALDYQORǴAN. QazAqparat - Almaty oblysynda boran men joldyń nashar kórinýine baılanysty kólik qozǵalysy shekteldi, dep habarlaıdy QazAqparat QR Indýstrııa jáne ınfraqurylymdyq damý mınıstrligine silteme jasap.
Atap aıtqanda, búgin saǵat 17.00-den bastap «Saryózek-Kóktal» avtojolynyń 45-68 shaqyrym aralyǵynda (Altyn Emel asýy), ıaǵnı «RSÝ-1» JShS rekonstrýktsııa ýchaskesinde avtokóliktiń barlyq túrleri úshin qozǵalysqa tyıym salyndy.
«Tótenshe jaǵdaılardy boldyrmaý maqsatynda kólik ıelerine alys saparǵa shyqpaýǵa keńes beriledi. Oqys jaǵdaı oryn alsa, 1403 nómiri boıynsha táýlik boıy jumys isteıtin call-ortalyqqa habarlasýǵa bolady», - delingen vedomstvo málimetinde.
Eske salaıyq buǵan deıin qar, boran jáne joldyń nashar kórinýine baılanysty Jambyl oblysyndaǵy «Almaty-Tashkent-Termez» avtojolynyń 160-238 shaqyrym aralyǵy (Kenen jáne Blagoveşenka kentteri arasyndaǵy ýchaske) kóliktiń barlyq túrleri úshin jabyldy.
Búgin Jambyl oblysynda qatty daýyl soǵyp, saldarynan Taraz qalasynda nysandardyń jartysynan kóbi elektr jaryǵynan ajyratyldy, elektr tasymaldaý jelileri isten shyqty, kóptegen ǵımarattyń shatyry julynyp, aǵashtar qulady, avtomobılder búlindi.
Daýyl saldarynan qazirgi ýaqytta birqatar aýdan jaryqsyz jáne kógildir otynsyz otyr. Osy ýaqytqa deıin qarly boranda jolda qalyp qoıǵan 26 adam qutqaryldy.
Sondaı-aq búgin Túrkistan oblysynda boran saldarynan 44 eldi meken jaryqsyz qalyp, joldar jabyldy.
Budan bólek, Shymkent qalasynda 23 baǵyt boıynsha elektr energııasyn berý toqtatyldy. Mektepter onlaın oqýǵa aýystyryldy.
