Almaty oblysynda bopsalaýmen aınalysqan qylmystyq top ustaldy
TALDYQORǴAN. QazAqparat - Almaty oblysynyń polıtseıleri adam bopsalaýmen aınalysqan qylmystyq topty qolǵa túsirdi, dep habarlaıdy QazAqparat tilshisi.
Almaty oblysy polıtsııa departamenti ekstremızmge qarsy kúres basqarmasynyń qyzmetkerleri Balpyq bı kentiniń 28 jastaǵy turǵyny bopsalaýmen aınalysyp, jastardy qorqytyp, olardan aqshalaı alym jınaıtyny týraly jedel aqparat aldy.
18 jastaǵy jábirlenýshiniń aıtýynsha, beıtanys adam aýdan ortalyǵyndaǵy saýda úıinde ózin jergilikti «Bedeldimin» dep tanystyryp, qorqytyp, zorlyq kórsetip, bir apta ishinde belgili bir somany taýyp berýdi talap etken.
Al eger polıtsııaǵa júginse, kez kelgen jerde oǵan qylmyskerler maza bermeıtinin aıtyp, óziniń qylmystyq ortada úlken baılanysy bar ekenin túsindirgen. Sol jerde jábirlenýshiniń telefon nómirin jazyp alǵan.
Birneshe kúnnen keıin jábirlenýshige qońyraý shalǵan 23 jáne 29 jastaǵy eki adam bopsalaýshy talap etken qarjyny alyp ketken.
Atalǵan derek boıynsha QR Qylmystyq kodeksiniń 194-baby 1-bóligi boıynsha sotqa deıingi tergeý amaldary júrgizilýde. Barlyq kúdiktiler ustaldy.
Negizgi kúdiktiniń buǵan deıin buzaqylyq pen usaq buzaqylyq jasaǵany úshin eki ret jaýapkershilikke tartylǵany belgili boldy.
Ustalǵandardyń osyǵan uqsas ózge de qylmystarǵa qatysy bar-joǵy tekserilip jatyr.
