Almaty oblysynda bokstan Dinmuhmed Qonaevtyń 100 jyldyǵyna arnalǵan týrnır ótti
ALMATY. 11 maýsym. QazAqparat - Almaty oblysynyń Eńbekshiqazaq aýdanyndaǵy Shelek aýylynda 7-10 maýsym kúnderi kórnekti memleket jáne qoǵam qaıratkeri Dinmuhamed Qonaevtyń 100 jyldyǵyna arnalǵan boks týrnıri boldy.
Ony «Dınamo» dene shynyqtyrý sport qoǵamynyń Ortalyq keńesi men «Sultan» qoǵamdyq qory birlesip uıymdastyrdy. Oǵan Almaty qalasy men Almaty, Ońtústik Qazaqstan, Shyǵys Qazaqstan oblystarynan jáne Qyrǵyzstan, Mıanma sııaqty shet elderden 108 sportshy qatysty.
«Bul týrnırdiń ózgelerden ereksheligi sol, onyń aýyldy mekende ótkizilýi. Qalada ótetin saıystarǵa qatysý aýyldyq jerdegi sportshylarǵa ońaıǵa soqpaıdy. Aýylda talantty sportshylar kóp. Solardy shyńdap, jigerlendire túsý úshin osyndaı sharalardy qaladan shetkeri jatqan eldi mekende ótkizýdi jón kórdik», - deıdi «Dınamo» DShSQ Sport basqarmasynyń sporttyq rezerv bóliminiń bastyǵy Vladımır Kolomets. Al týrnırdiń bas tóreshisi Rahymjan Sydyqov: «Jalpy bul týrnırdegi basty maqsat - jastar arasynda sportty nasıhattaý. Sondaı-aq memleketimizdiń órkendep ósýine zor úles qosqan saıası qoǵam qaıratkeri, elimizdiń birtýar azamaty Dinmuhamed Qonaevty keńinen tanystyrý. Biz aýyldy jerde osyndaı jarystar ótkizgen saıyn talantty balalardy tanyp, olardyń boıyndaǵy qabiletin damytý úshin iriktep alyp otyramyz. Qazir oqýshylardyń barlyǵy jazǵy demalysqa shyqty, biraq ta biz jattyǵý jumystaryn toqtatpaımyz. Aldaǵy tamyz aıynda osyndaı taǵy bir týrnır ótkizemiz, eger onda sportshylar jaqsy óner kórsetse, daryndy balalarǵa arnalǵan sport mektepterine qabyldaımyz», deıdi.
Tórt kúnge sozylǵan 1994-2001 jylǵy bylǵary qolǵap ıeleri arasyndaǵy saıysta Almaty qalasynan barǵan «Dınamo» komandasy birinshi oryndy jeńip aldy. Mıanmadan kelgen 8 sporshynyń úsheýi aqtyq synǵa shyǵyp, ekeýi chempıon atandy. Jarystyń joǵary deńgeıde ótkenin aıtqan bas tóreshi bul týrnırge sportshylardyń úlken daıyndyqpen kelgendigin aıtyp otyr. Onyń aıtýynsha, Mıanma elinen kelgen ókilder Qazaqstanda sporttyń bul túri óte jaqsy jolǵa qoıylǵandyǵyn moıyndap, tájirıbe almasýǵa shaqyrǵan. Olarǵa qazirgi ýaqytta qazaqstandyq Berik Qasymqanov sporttyń bul túrin damytý úshin qol ushyn berip júrgen kórinedi.
