Almaty oblysynda bıyl jol apatynan 300-den asa adam mert bolǵan
TALDYQORǴAN.QazAqparat - Bıyl Almaty oblysynda jol-kólik apatynan 300-den asa adam ajal qushqan. Onyń 94-i qozǵalys jyldamdyǵyn asyrý saldarynan kóz jumǵan, - dep habarlaıdy QazAqparat tilshisi.
Sondaı-aq, 130 jaıaý júrginshini kólik qaǵyp mert bolǵan. Polıtseıler 77 jaıaý júrginshi jol júrý erejesin saqtamaı, kóliktiń astyna túskenderin aıtady. Al 18 qarasha kúni búkil álem boıynsha kólik apatynan qurban bolǵandardy eske alý kúni. Osyǵan oraı Almaty oblysynda kólik apatynan qurban bolǵan jandardyń beınesi qaǵazdan jasalyp, adamdar kóp júretin jerlerge qoıyldy. Máselen, ondaı beıneler mamandandyrylǵan halyqqa qyzmet kórsetý ortalyǵyna qoıyldy. Al qaǵaz beınelerde kólik apatynan qaıtys bolǵan adamnyń jasy, neden qaıtys bolǵany, aty barlyǵy jazylǵan.
«Bul jerdiń tańdap alynǵany beker emes. Sebebi, kólik júrgizýshileri bul jerge kóptep keledi. Beıneler qalanyń ózge jerlerine de qoıylady.
Ótkizilip jatqan sharanyń maqsaty júrgizýshi bolsyn, jaıaý júrginshi bolsyn, olardyń joldaǵy qaýipsizdigi men óziniń tártibin oıǵa salý», - dedi Almaty oblystyq Polıtsııa departamenti jergilikti polıtsııa qyzmetiniń aǵa ınspektory Aıjan Álibaıqyzy.
Al Taldyqorǵan qalasynyń turǵyny, 10 jyldan beri kólik júrgizip kele jatqan Rýslan Orynbekov qaǵaz beıneler oǵan oı salǵanyn jetkizdi.
«Aq manıkenderden attaryn oqydym. Jastaryn kórdim. Solarǵa qarap oılandym. Ne úshin ornatylǵanyn túsindim. Oı salatyn dúnıe eken», - dedi ol.
