Almaty oblysynda bıyl ekologııa zańdarynyń buzylýyna baılanysty 257 is qozǵaldy
TALDYQORǴAN. QazAqparat - 2019 jyldyń І jartyjyldyǵynda Almaty oblysynda polıtseıler tabıǵat qorǵaý zańnamasynyń talaptaryn buzýdyń 749 deregin áshkerelep, onyń 257 deregi boıynsha qylmystyq is qozǵaǵan.
Ákimshilik hattama toltyrylǵan 492 tulǵaǵa 3 456 350 teńge aıyppul saldy, dep habarlaıdy QazAqparat tilshisi oblystyq polıtsııa departamentiniń baspasóz qyzmetine silteme jasap.
Almaty oblysynyń tártip saqshylary arnaıy is-shara barysynda atýǵa tyıym salynǵan buǵy ańyn atyp alý deregin anyqtady.
«Kegen aýdanyna qarasty «Ekiasha» jaılaýynda 39 jastaǵy aýyl turǵynynyń ÝAZ avtokóliginen jabaıy ańnyń eti men terisi tabyldy. Kúdiktiniń aıtýynsha, ol buǵynyń eti, múıizi men terisi eken. Ańnyń eti, múıizi men terisi tárkilenip, saraptamaǵa joldandy»,- dedi Almaty oblysy PD Tabıǵat qorǵaý polıtsııasynyń ınspektory Baǵlan Rymjanov.
Sonymen qatar, Eskeldi aýdanynyń polıtseıleri de tabıǵat qorǵaý zańnamasyn óreskel buzǵan jergilikti turǵynnyń isin áshkere qyldy. Joǵalý qaýpi tóngen ósimdikterdi jınady degen kúdikke ilingen 38 jastaǵy turǵynnyń úıinen jalpy salmaǵy 32 kılogramm bolatyn «pıaý» tamyry tabylyp, tárkilendi. Tergeý barysynda qyzyl kitapqa engizilgen tamyrdy ol «Myńbulaq» atty taýdan emdik maqsatta paıdalaný úshin qazyp alǵany anyqtaldy.
Qazirgi ýaqytta atalǵan derekter boıynsha sotqa deıingi tergeý amaldary júrgizilýde. Saraptama qorytyndysyna sáıkes memleketke keltirilgen materıaldyq shyǵyn anyqtalatyn bolady. Kúdikti tulǵalar tergeý barysynda mekenjaıyn ózgertpeý týraly mindettememen bosatyldy.
Polıtsııa ókiliniń aqparatyna sáıkes, Balqash aýdanynyń tártip saqshylary tabıǵat qorǵaý organdarymen birlese otyryp, bir táýlik ishinde zańsyz balyq aýlaýdyń eki deregin anyqtaǵan. Qaraǵandy oblysynyń 26 jáne 29 jastaǵy eki turǵynynan plastıkalyq qaıyq, qozǵaltqysh motorlar, 500 metrlik balyq aýlary jáne 150 kılogramǵa jýyq balyq tárkilendi. Eki derek boıynsha memleketke 1 mıllıon 300 myńnan astam materıaldyq shyǵyn keltirilgeni anyqtaldy.
