Almaty oblysynda bıyl 50 myń tonna qant óndirý josparlanyp otyr
TALDYQORǴAN. QazAqparat - Búgingi kúni Almaty oblysynyń basym baǵyttarynyń biri – aýyl sharýashylyǵy jáne onyń damýyna memleket tarapynan eleýli qoldaý kórsetilýde. Bıylǵy jyly qant qyzylshasynyń alqaby 16 myń gektarǵa jetti. Odan 550 myń tonna ónim alyp, 50 myń tonna aq qant óndirý josparlanyp otyr, dep habarlaıdy QazAqparat tilshisi.
Elbasynyń qant qyzylshasynyń burynǵy dańqyn jańǵyrtý týraly tapsyrmasyn oryndaý maqsatynda oblys basshylyǵy 2014 jyldan bastap barlyq qajetti sharalardy qabyldady.
Eger 2014 jyly qant qyzylshasynyń alqaby 1,2 myń gektar bolsa, 2020 jyly ol 16 myń gektarǵa jetkizilip, 14 esege jýyq ulǵaıtyldy.
Mundaı nátıjege qol jetkizý úshin oblystyń sharýa qojalyqtaryna sýbsıdııa berilip, Frantsııa, Germanııa, Danııa elderinen ákelingen joǵary ónimdilikti tuqym berildi. Arnaıy tehnıka jáne janar-jaǵarmaı máselesi de sheshildi.
«Jetisý» ÁKK» UK» AQ-nyń qatysýymen qant qyzylshasy baǵytynda 29 servıstik-daıyndaý ortalyqtary qurylyp, quny 6,4 mlrd teńge bolatyn 621 arnaıy tehnıka satyp alyndy. SDO-lar úshin barlyǵy 1200 aýyl sharýashylyǵy tehnıkasy satyp alynyp, qarjylyq lızıngige berildi.
«Biz qant qyzylshasyn ósirýmen qatar óńdeý isin de sheshtik. Qyzylsha ósirý óte aýyr jumysty talap etedi. Sondyqtan onyń ár tal ónimin shashaý shyǵarmaı óńdeýdi jolǵa qoıýymyz kerek boldy. Sondyqtan biz eń aldymen jyldar boıy toqtap turǵan Kóksý qant zaýytyn, odan keıin Aqsý qant zaýytyn iske qostyq. Investorlar tarttyq. Olar zaýytty qaıta jańǵyrtýdan ótkizip, otandyq, reseılik, ýkraınalyq jáne basqa da sheteldik eń ozyq úlgidegi qural-jabdyqtardy ornatty. Sol sııaqty zaýyttarda burynnan istegen mamandardy qaıta shaqyrdyq», - dep atap ótti óńir basshysy A.Batalov.
