Almaty oblysynda birneshe aýylda úı tonaǵan kúdikti ustaldy
TALDYQORǴAN. QazAqparat - Almaty oblysynyń Talǵar aýdanynda polıtseıler birneshe aýylda úı tonaǵan kúdiktini ustady, - dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, Talǵar aýdany Keńdala, Aqtas, Besaǵash jáne Avat aýyldarynyń aýmaǵynda osy jyldyń tamyz – qyrkúıek aılarynda jeke menshik úılerde 9 urlyq deregi tirkelgen. Taǵy ekeýi aqpan jáne maýsym aılarynda jasalǵan. Qylmys jasaý tásili men urlanǵan qundylyqtarǵa sáıkes, tártip saqshylary olardy bir adam jasaǵan degen qorytyndyǵa keldi.
«Negizinen, jeńil aqshany jaqsy kóretin azamattyń úıge enýdegi ádisi- tereze arqyly bolǵan. Alaıda keı jaǵdaılarda ol ashyq esikter arqyly da úılerge kirgen. Ol barlyq qundy zattardy, aqsha, altyn buıymdar, teledıdarlar, spırttik ónimder, tamaq ónimderin jáne telefondardy qoldy qylǵan.Urlanǵan buıymdardyń qatarynda dánekerleý apparaty da bar»,-deıdi Talǵar APB bastyǵynyń orynbasary polıtsııa polkovnıgi Andreı Býrıanskıı.
Tártip saqshylary Eńbekshiqazaq aýdanynyń 41 jastaǵy, buryn birneshe ret sottalǵan, esh jerde jumys istemeıtin turǵynynyń izine tústi. Nátıjesinde kúdikti ustalyp, ol óz kinásin tolyq moıyndady. Urlanǵan zattardyń bir bóligi zańdy ıelerine qaıtaryldy. Keıbir qundy buıymdar tabylmady. Biraq olardy satyp alǵan kýágerlerdiń aıǵaqtary bar. Aınalasyndaǵy aýyldardyń turǵyndaryna tynyshtyq bermegen uryny quryqtaǵan úshin jábirlenýshiler polıtseılerge shyn júrekten alǵystaryn bildirdi. Kúdikti ustalǵannan keıin urlyq sany kúrt azaıǵan.
«Jeke basyn, sottylyǵynyń bolýyn, jasalǵan qylmystardyń sanyn, keltirilgen zalaldyń ótelmeýin eskere otyryp, kúdiktige sotqa deıingi tergep-tekserý kezeńinde kúzetpen ustaý túrindegi bultartpaý sharasy tańdaldy. Onyń basqa da osyǵan uqsas ashylmaǵan qylmystarǵa qatystylyǵyn tekserý boıynsha jumystar jalǵasýda», - dep tolyqtyrdy polıtsııa polkovnıgi Andreı Býrıanskıı.
