Almaty oblysynda bir jyl boıy sottan qashyp júrgen júrgizýshi ustaldy
TALDYQORǴAN. QazAqparat -Almaty oblysynda sottyń jazasynan qashyp júrgen kólik júrgizýshi ustaldy. Óńirdiń polıtseıleri izdeý jarııalanǵan 29 jastaǵy jigitti qystaqtardyń birinde qolǵa túsirdi, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 2018 jyldyń kúz aıynda Іle aýdanynda jol-kólik oqıǵa bolǵan. Saldarynan kóliktegi jolaýshy, 50 jastaǵy er adam kóz jumǵan. Al kóliktiń júrgizýshisi Almaty qalasynyń turǵyny bolǵan. Ol tergeý barysynda qolhatpen jiberilgen. Biraq 29 jastaǵy azamat sotqa kelmeı, qashyp júrgen. Sońynda jaýapkershilikten qutylmaq bolǵan kólik júrgizýshige izdeý jarııalandy.
«Іzdeý jumystary Іle aýdanynda keń kólemde uıymdastyryldy. Іzdeý jarııalanǵan adamnyń meken-jaıy anyqtaldy. Ol shalǵaıdaǵy qystaqtardyń birinde jasyrynǵan. Al osy ýaqytqa deıin kúdiktiniń kóligi arnaıy turaqta turdy. Qazir ustalǵan kólik júrgizýshi Іle aýdanynyń polıtsııasyna jetkizilip, qamaýǵa alyndy», dep málimdedi atalǵan vedomstvo qyzmetinen.
Jaqyn kúnderi adam ólimimen aıaqtalǵan jol kólik oqıǵasyna kináli adamnyń isi sotqa jiberiledi.
«Endi ol osy ýaqyt boıy jaýapkershilikten qashqany úshin de zań aldynda jaýap beredi», dep tolyqtyrdy oblystyq polıtsııa departametiniń polıtseıleri.
