Almaty oblysynda bir úıir jylqyny barymtalaǵandar ustaldy
TALDYQORǴAN. QazAqparat - Almaty oblysynda bir úıir jylqyny aıdap alyp ketken barymtashylar toby quryqtaldy, dep habarlaıdy QazAqparat tilshisi. 35 bas jylqynyń joǵalǵany týraly aqparat Aqsý aýdanynyń ishki ister bólimine kelip túsken. Shaǵymdanýshy aýdanda tanymal jylqyshy bolyp shyqty.
Ol 4 kún buryn jylqynyń Kóltaban aýyly mańyndaǵy jaıylymnan aıdap áketilgeni jáne óz kúshimen izdegeninen eshqandaı nátıje bermegendigin málimdegen.
Jedel izdestirý shara barysynda Aqsý aýdandyq ІІB mamandary táýlik ishinde urlanǵan jylqy izine túsip, bir top barymtashylardy ustady. Qambar ata tólin tártip saqshylary Eskeldi aýdany, Syrymbet aýylyndaǵy jeke úı aýlasynan taýyp aldy. Sol jerde polıtseıler jylqy urlady degen kúdikpen 6 adamdy tutqyndap, Aqsý aýdandyq ІІB jetkizildi. Tártip saqshylary 20 jylqyny taýyp ıesine qaıtardy.
Aıta keterlik jaıt, barymtashylar bir jylqyny qasaptap soıyp jatqan kezde ustaldy. Maldyń eti de tirkelip, jylqyshyǵa berildi. Jolshybaı satylyp ketken qalǵan 14 jylqy da izdestirilip jatyr.Tergeý amaldary QR QK 188 baby 3-shi bóligine saı júrgizilýde. Sondaı-aq barymtashylardyń basqa da qylmysqa qatysy bar-joǵy anyqtalýda.
