Almaty oblysynda bir top oralman azamattyq ala almaı júr

TALDYQORǴAN.QazAqparat - Almaty oblysynda bir top oralman azamattyq ala almaı júr. Tipti aralarynda on jyldan beri týǵan jerde turaqtap qalýǵa múmkindik beretin qujatqa qol jetkize almaı, sandalyp júrgenderi de bar, dep habarlaıdy QazAqparat tilshisi.

«Men kelgeli 10 jyl boldy. Áli Qytaıdyń pasportyn ustap júrmin. Ýaqyt bitken dep, jańalatyp alyp keldim. Endi Qytaıǵa baryp kelesiń, bir jyl Qytaıda turasyń deıdi. Mynaý eki-aq aıǵa tirkelgen eken. Myna jaqta bala-shaǵam bar, endi ne isterimdi bilmeımin. Elim-jerim, otanym dep keldim ǵoı», - deıdi Pázil Álim.

 

Taldyqorǵan qalasyndaǵy oblystyq kóshi-qon basqarmasynyń aldyna jınalǵan bir top aǵaıynnyń basyndaǵy problema  osy eken. Máselen,  Aqaı Kúlshara 7 jyldan beri atalǵan qujatqa qol jetkize almaı keledi.

«2013 jyly maǵan azamattyq berilsin dep UQK ruqsat bergen. Qujatymdy tapsyrǵan, mine bárin bergen. Biraq osy qaǵazdy ala almaı júrmin. Men qytaıdyń pasportyn ustap júrgim kelmeıdi. Qytaıǵa qaıta oralǵym kelmeıdi. Men óz elimde turǵym keledi», - deıdi ol.

 

Al oblystyq kóshi-qonnyń azamattyq bólimine endi ǵana basshy bolǵan sheneýnik árqaısysynyń máselesimen tanysamyn dep ýáde berdi.

«Azamattyqqa qabyldamaıdy degen sóz joq. Bári qabyldanady. Biraq ártúrli tártippen qabyldanady. Árqaısysyn jeke qarastyraıyn, sosyn qalaı jaýap berý kerek ekenin ózim túsindirip aıtaıyn», - dedi Almaty oblystyq kóshi-qon qyzmeti basqarmasy azamattyq bóliminiń bastyǵy Tóleýjan Júndibaev.

Qandastarymyz ne balalaryna, ne ózderine azamattyq buıyrmaı, dúnıe-múlikti azamattyǵy bar adamnyń atyna aýystyryp, úreımen kún keship, jaltaqtaýdan  jalyqtyq deıdi. Tipti  keıbiri azamattyq alamyn dep júgirip júrip, oralman kýáliginiń de merzimin  ótkizip alǵan.

 

«Oralman kýáliktiń ýaqyty sozylsa, azamattyqqa qabyldaıdy eken. Biraq oralman kýálikti sozatyn qısyn joq, sonymen turmyz», deıdi Eskeldi aýdanynyń turǵyny Bekserik Zeınesh.

 

Tyǵyryqqa tireldik degen aǵaıyn endi erteńgi kúnderine alańdaýly.